کراچی : قومی احتساب بیورو نے فشریز کے سابق چیئرمین نثار مورائی کے گرد شکنجہ مزید تنگ کردیا، نثار مورائی کو دہشت گردی اور سہولت کاری کے الزامات کا بھی سامنا ہے۔
تفصیلات کے مطابق قومی احتساب بیورو (نیب) نے سابق چیئرمین نثار مورائی کے اربوں روپے کے اثاثوں کا سراغ لگالیا جس کے بعد نثار مورائی کے گرد نیب کا شکنجہ مزید سخت ہوگیا۔
ذرائع کا کہنا ہے کہ سابق چیئرمین فشریز نثار مورائی شوگر مل کے حصے دار بھی نکلے، نثارمورائی، فیملی کے اکاؤنٹ میں پنگریو شوگر ملز سے کروڑوں جمع کرائے گئے۔
ذرائع کا کہنا ہے کہ قومی احتساب بیورو کی ٹیم نے پنگریو شوگر مل کے چیف ایگزیکٹو کا بیان ریکارڈ کرلیا، جس کے بعد جائیداد کی تصدیق کیلئے بدین ، ٹنڈو محمد خان کے ڈی سیز سے رپورٹ بھی طلب کرلی۔
نیب حکام کا کہنا ہے کہ کراچی، حیدرآباد، متحدہ عرب امارات میں جائیدادوں کا پہلے ہی سراغ لگایا جاچکا ہے، نثار مورائی کو دہشت گردی اور سہولت کاری کے الزامات کا بھی سامنا ہے۔
یاد رہے کہ نیب نے 2018 میں سابق چیئرمین فشریز نثار مورائی کو غیرقانونی بھرتیوں اور کرپشن کےالزام میں گرفتار کیا تھا، ملزم کا شمار آصف زرداری کےقریبی ساتھیوں میں ہوتا ہے۔
