کراچی: صوبہ سندھ کے دارالحکومت کراچی میں نادرا کا ایک اور میگا سینٹر کھولا جارہا ہے جس کے بعد شناختی دستاویزات کے حصول کے لیے شہریوں کی مشکلات میں کمی آئے گی۔
تفصیلات کے مطابق نادرا کے نئے میگا سینٹر کی تیاری جاری ہے، ڈائریکٹر جنرل نادرا کا کہنا ہے کہ کراچی میں 6 سال بعد بننے والا میگا سینٹر آئندہ 2 سے ڈھائی ماہ میں مکمل ہوجائے گا۔
ڈی جی کا کہنا ہے کہ یونیورسٹی روڈ پر بننے والے میگا سینٹر کے لیے جگہ 5 ماہ قبل لی گئی تھی، 4 بار جاری ٹینڈر میں کسی نے دلچسپی نہیں لی تھی، چوتھے ٹینڈر میں کوٹیشنز آگئی ہیں۔
انہوں نے کہا کہ ستمبر میں شہر میں 6 سال کے بعد میگا سینٹر کھول دیا جائے گا۔
ڈی جی کا کہنا تھا کہ حیدر آباد کے شہریوں کے لیے بھی میگا سینٹر کا قیام آخری مراحل میں ہے، ماہ جولائی میں حیدر آباد لطیف آباد میں میگا سینٹر کھول دیا جائے گا۔
انہوں نے کہا کہ سندھ میں 2 نادرا سینٹر میں پاسپورٹ کے لیے کاؤنٹر کھولے جا رہے ہیں، کراچی ملیر اور عمر کوٹ میں نادرا سینٹرز میں پاسپورٹ کاؤنٹرز بنائے گئے ہیں، آنکھوں کے ذریعے شناخت کا نظام ابھی ڈی ایچ اے میگا نادرا آفس میں نصب کیا گیا ہے۔
