کراچی: ایف آئی اے نے نادرا کے اسمارٹ کارڈ اسکینڈل میں ڈھائی کروڑ ڈالر کی مبینہ کرپشن اور مالی بے ضابطگیوں کا مقدمہ درج کر لیا۔
تفصیلات کے مطابق ایف آئی اے نے کہا ہے کہ اسمارٹ کارڈ اسکینڈل میں سابق چیئرمین نادرا طارق ملک اور سابق چیف پروجیکٹ ڈائریکٹر گوہر احمد خان سمیت 11 افسران کے خلاف مقدمہ درج کیا گیا ہے۔
ایف آئی اے نے ٹرانسپرنسی انٹرنیشنل کی جانب سے بے ضابطگیوں کی نشان دہی کے بعد وزارت داخلہ کی ہدایت پر یہ کارروائی کی ہے، نادرا حکام پر پبلک پروکیورمنٹ ریگولیٹری اتھارٹی رولز کی خلاف ورزی، کک بیکس اور کمیشن کے عوض قومی خزانے کو نقصان پہنچانے کا الزام ہے۔
کیا نادرا عوام کو سہولیات دینے میں ناکام ہو رہا ہے؟ ویڈیو رپورٹ
ایف آئی اے ذرائع کے مطابق مقدمے میں چیف پراجیکٹ آفیسر سمیت دیگر افسران کو بھی ملزم نامزد کیا گیا ہے، افسران پر کرپشن، اختیارات کے ناجائز استعمال اور امانت میں خیانت کے الزامات عائد کیے گئے ہیں۔
نادرا نے اسمارٹ کارڈز کی خریداری مارکیٹ ریٹ سے کئی گنا زیادہ قیمت پر کی، مارکیٹ میں فی کارڈ کی قیمت 3 سینٹ تھی جب کہ نادرا نے 99 سینٹ فی کارڈ کے حساب سے خریداری کی۔ 2020 میں فی کارڈ قیمت 68 سینٹ تھی جو 2022 میں اچانک بڑھ کر 99 سینٹ کر دی گئی۔
ایف آئی اے کے مطابق ایک مخصوص کمپنی کو فائدہ پہنچانے کے لیے ٹینڈر کے عمل میں دانستہ تبدیلیاں کی گئیں، اس سلسلے میں مزید تحقیقات بھی جاری ہیں اور نادرا کے مزید افسران کو ملزم نامزد کیا جا سکتا ہے، اور اربوں روپے کی مبینہ کرپشن کے مزید انکشافات متوقع ہیں۔
