نیویارک : وزیر اعظم کے معاون خصوصی نعیم الحق نے کہا ہے کہ مقبوضہ کشمیر میں بھارتی مظالم اپنی انتہا کو پہنچ چکے ہیں جس کا احساس اب امریکہ کو بھی ہوچکا ہے۔
ان خیالات کا اظہار انہوں نے امریکہ میں پاکستانی کمیونٹی سے خطاب کرتے ہوئے کیا معاون خصوصی نعیم الحق نے کہا کہ امریکہ کواحساس ہوچکا ہے کہ مقبوضہ کشمیر کی نوعیت غیر معمولی ہے۔
امریکی حکومت کو بھی اس بات کااحساس ہوچکا ہے کہ مسئلہ کشمیر گھمبیر صورت اختیار کرتا جارہا ہے۔ انہوں نے کہا کہ مقبوضہ کشمیر میں بھارتی مظالم اپنی انتہا کوپہنچ چکے ہیں۔
بھارت مسئلہ کشمیر پر مذاکرات سے گریز کرتارہا ہے ۔انہوں نے کہا کہ مسئلہ کشمیر پر پاکستان کی حکومت اور عوام پوری دنیا میں ساتھ کھڑے ہیں۔
نعیم الحق کا مزید کہنا تھا کہ کشمیر کا مسئلہ اس نہج پر پہنچ چکا ہے کہ اب اس سے پیچھے نہیں ہٹا جا سکتا، بھارت جب تک پاکستان کے ساتھ بیٹھ کر مذاکرات نہیں کرتا یہ مسئلہ حل نہیں ہوگا ۔
انہوں نے کہا کہ اگر بھارتی مظالم نہ رکے تو حالات قابو سے باہر ہوجائیں گے ،بھارت کی معیشت دم توڑ رہی ہے اور وہاں انتہا پسندی زور پکڑ رہی ہے ۔
بھارتی عوام مقبوضہ کشمیر پر تقسیم ہوچکی ہے اور بھارتی سپریم کورٹ مودی کا پٹھو بن چکاہے۔
