راولپنڈی: وزیراعظم کے معاون خصوصی نعیم الحق نے کہا ہے کہ مسلم لیگ ن گمراہ کن پروپیگنڈہ کررہی ہے، نواز شریف کو سہولتیں میسر ہیں، شہباز شریف نے آتے ہی وزیراعظم پر فقرے کسنے شروع کردئیے۔
تفصیلات کے مطابق وزیراعظم کے معاون خصوصی نعیم الحق نے میڈیا سے گفتگو کرتے ہوئے کہا کہ شیخ رشید نے کہا تھا ملزم کیسے پی اے سی میں شرکت کرسکتے ہیں، ہمیں پارلیمنٹ میں اپوزیشن کے تعاون کی ضرورت ہے۔
انہوں نے کہا کہ وزیراعظم کی خواہش ہے نوجوانوں کے لیے کھیلوں کی سرگرمیاں بحال کی جائیں، پاکستان کے دور دراز علاقوں میں گراؤنڈز آباد کریں گے اور درخت لگائیں گے، چاہتے ہیں نئی نسل ایک صحت مند ماحول میں نشو نما پائے۔
نعیم الحق نے کہا کہ وہ ہیرے جو ریت میں چھپے ہیں کھیل سے ملک کا نام روشن کرسکتے ہیں، وزیراعظم انقلابی تبدیلی لارہے ہیں اور مزید گراؤنڈز بھی بنا رہے ہیں، جو نظام ملک میں رائج ہے اس میں مسائل کا حل موجود نہیں ہے۔
مزید پڑھیں: ملک لوٹنےوالوں کاٹولہ ایک ہوگیا،نعیم الحق کااپوزیشن کےاتحاد پرتبصرہ
انہوں نے کہا کہ 50 لاکھ گھر بنانے جارہے ہیں اور اس کا آغاز ہوچکا ہے، ڈگریوں والے افراد کی بے روزگاری کی ذمہ دار گزشتہ حکومت ہے، ایک کروڑ نوکریوں کا آغاز ہوچکا ہے۔
نعیم الحق نے کہا کہ اپوزیشن لیڈر جو اس وقت قومی اسمبلی میں کررہے ہیں وہ افسوس ناک ہے، وزیراعظم نے پارلیمںٹ کے لیے اچھی تقریر تیار کی تھی، اپوزیشن کے شور شرابے کی وجہ سے وزیراعظم تقریر نہ کرسکے۔
سانحہ ساہیوال کے حوالے سے گفتگو کرتے ہوئے نعیم الحق نے کہا کہ سانحہ ساہیوال کے قاتلوں پر مقدمہ بن چکا ہے، ملزمان کو قرار واقعی سزا ملے گی۔
