ٹوکیو : جاپانی یونیورسٹی نے سیگریٹ کا نشہ چھڑوانے کےلیے سیگریٹ نوشی کی عادت میں گرفتار اساتذہ کے یونیورسٹی میں داخلے پر پابندی عائد کردی۔
تفصلات کے مطابق نشہ سیگریٹ کا ہو یا چائے کا اگر لت لگ جائے تو چھڑوانا مشکل ہوجاتا ہے لیکن جاپان کی ناگاساکی نامی یونیورسٹی کی انتطامیہ نے نشے کی بُری عادت میں گرفتار اساتذہ سے سیگریٹ نوشی ترک کرانے کا انوکھا طریقہ نکال لیا۔
غیر ملکی میڈیا کا کہنا تھا کہ جاپان کی ایک یونیورسٹی نے سیگریٹ نوشی کرنے والے اساتذہ کی نشے کی لعنت سے چھٹکارا پانے کے لیے ان کے یونیورسٹی میں داخلے پر پابندی لگانے کا اعلان کردیا ہے۔
غیر ملکی خبر رساں ادارے کا کہنا تھا کہ جنوب مغربی جاپان کی ناگا ساکی یونیورسٹی کے ترجمان یوسو تاکاکورا نے کہا کہ ہماراخیال ہے کہ سیگریٹ نوشی تدریسی عمل کے خلاف ہے۔
ان کا کہنا تھا کہ سیگریٹ نوشی کرنے والے اساتذہ کے جامعہ میں داخلے پر پابندی سے شہری آزادیوں کے قانون کی خلاف ورزی نہیں ہوتی۔
مقامی ذرائع ابلاغ کے مطابق جاپان میں ناگا ساکی یونیورسٹی اپنی نوعیت کی پہلی درسگاہ ہے جس میں سیگریٹ نوشی کرنے والے اساتذہ کے داخلے پر پابندی عاید کرنے کا فیصلہ کیا گیا ہے۔
ترجمان نے کہا کہ سگریٹ نوشی کرنےوالے اساتذہ کو آئندہ اگست تک کی مہلت دی جائے گی اور اس کے بعد یونیورسٹی کے دروازے ہر اس پروفیسر اور استاد پر بند کردیئے جائیں گے جس جو سگریٹ نوشی ترک نہیں کرے گا۔
خیال رہے کہ جاپان کے کئی شہروں میں مقامی حکومتوں نے پبلک مقامات پر سگریٹ نوشی کو ممنوع قرار دے رکھا ہے تاہم کسی تعلیمی ادارے میں اس طرح کی پابندی کا یہ پہلا واقعہ ہے۔
