اسلام آباد: پی سی بی کی مینجمنٹ کمیٹی کے چیئرمین نجم سیٹھی نے سابقہ مینجمنٹ کو ٹیسٹ کرکٹ میں خراب کارکردگی کا ذمہ دار قرار دے دیا ہے۔
نجم سیٹھی نے غیرملکی میڈیا کو دیے گئے انٹرویو میں کہا کہ ماضی میں بہتر پچز بنانے پر توجہ نہیں دی گئی، ایسا لگتا ہے ٹیسٹ میچ کرکٹ پچھلے 4 سال میں ختم ہو گئی ہے۔
انہوں نے کہا کہ پی سی بی کی سابقہ مینجمنٹ نے ڈومیسٹک اسٹرکچر برباد کردیا ہے، پی سی بی اعلیٰ عہدیداران نے ٹیسٹ کرکٹ میں غیرمعیاری پچز بنوائیں وہ ٹیسٹ میچ ڈرا کے لیے کھیلنا چاہتےتھے۔
پی سی بی کی مینجمنٹ کمیٹی کے چیئرمین نجم سیٹھی کا کہنا ہے کہ شاہد آفریدی پاکستان میں گرین پچ کے حامی ہیں، ان جیسے کھلاڑی کو ہمیں سلیکشن کمیٹی میں شامل کرنے کی ضرورت تھی کیونکہ وہ جارحانہ فیصلے کرنے کی اہلیت رکھتےہیں۔
چیئرمین پی سی بی نجم سیٹھی کا مزید کہنا تھا کہ شائقین اچھی کرکٹ دیکھنا چاہتے ہیں،جہاں ٹیسٹ میچ میں نتائج نکلیں۔
