لندن: سابق کرکٹر سرفراز نواز نے کہا ہے کہ نجم سیٹھی نے اوورسیز کوچز کو رکھ کر غلطی کی، انھوں نے کرکٹ کے فیصلے سیاسی طور پر کیے۔
تفصیلات کے مطابق لندن میں پریس کانفرنس کرتے ہوئے سابق کرکٹر سرفراز نواز نے کہا کہ ذکا اشرف نے پاکستان سپر لیگ شروع کی تھی، چیئرمین پی ٹی آئی ڈیپارٹمنٹ کرکٹ ختم کر کے کھیل تباہ کر گئے ہیں، وزیر اعظم کی ہدایت کے باوجود اداروں کی کرکٹ بحال نہیں ہو سکی۔
انھوں نے کہا نجم سیٹھی نے کرکٹ کے فیصلے سیاسی طور پر کیے، اور اوورسیز کوچز کو رکھ کر غلطی کی، فاسٹ بالنگ کے حوالے سے میں نئے کرکٹرز کو لیکچر دینے کو تیار ہوں۔
سرفراز نواز کا کہنا تھا کہ پاکستان کو دل بڑا کر کے بھارت ٹیم بھیجنی چاہیے، کرکٹ کے معاملات عدالت میں جانے سے پاکستان کی جگ ہنسائی ہوگی، چیف جسٹس کرکٹ کے معاملے پر سوموٹو نوٹس لیں۔
انھوں نے کہا کرکٹ کے معاملات پر حکم امتناع سے معاملات بگڑیں گے، اہم ٹورنامنٹس سے قبل چیئرمین کی تقرری پر تنازعہ افسوسناک ہے۔
