اسلام آباد : سپریم کورٹ میں نندی پورپاور پلانٹ میں بد انتظامی کیس کی سماعت کے دوران چیف جسٹس میاں ثاقب نثار نے نیب سے تمام زیرالتوا ریفرنسز کی تفصیلات طلب کرلیں۔
تفصیلات کے مطابق سپریم کورٹ میں چیف جسٹس آف پاکستان کی سربراہی میں تین رکنی بینچ نے نندی پور پاور پلانٹ میں بد انتظامی سے متعلق کیس کی سماعت کی۔
نیب پراسیکیوٹر نےعدالت عظمیٰ کو آگاہ کیا کہ نیب میں نندی پورپراجیکٹ سے متعلق کئی تحقیقات چل رہی ہیں جس پر چیف جسٹس نے کہا کہ نیب تمام ریفرنسز کی تفصیلات عدالت میں پیش کرے۔
چیف جسٹس میاں ثاقب نثار نے ریمارکس دیے کہ نیب اہم کیس سرد خانے میں رکھ کر بھول گیا۔ انہوں نے استفسار کیا کہ قمرالزماں چوہدری کے خلاف کیس میں تحقیقات آگے کیوں نہیں بڑھی۔
انہوں نے ریمارکس دیے کہ کیوں نہ کیس سرد خانے میں رکھنے پر کارروائی کی جائے، تحقیقات میں اتنا وقت کیوں لگتا ہے۔؟
نیب پراسیکیوٹرنے جواب دیا کہ تاخیرسے منظوری میں منصوبےکی لاگت میں اضافہ ہوا جبکہ تحقیقاتی رپورٹ ریجنل بورڈمیٹنگ میں منظوری کے لیے پیش کردی ہے۔
بعدازاں چیف جسٹس آف پاکستان نے نیب سے زیرالتوا ریفرنسز کی تفصیلاب طلب کرلیں۔
یاد رہے کہ گزشتہ روز سپریم کورٹ نے مسلم لیگ ن کے رہنما خواجہ آصف کی درخواست پرنندی پور کرپشن کیس ری اوپن کرتے ہوئے فریقین کو نوٹسزجاری کیے تھے۔
0
20
