اسلام آباد : ترجمان دفتر خارجہ نے کہا ہے کہ ننکانہ صاحب گوردوارہ میں آج دو مسلم گروپوں میں ہاتھا پائی ہوئی، جس کے بعد ملزمان کو گرفتارکر لیا گیا، واقعے کو مذہبی رنگ دینے کی کوششیں غلط ہیں۔
تفصیلات کے مطابق ننکانہ صاحب گوردوارہ میں دو مسلم گروپوں میں تکرار کے معاملے پر دفترخارجہ نے اپنے ردعمل میں کہا ہے کہ آج ننکانہ صاحب گوردوارہ میں دو مسلم گروپوں میں ہاتھا پائی ہوئی ہے۔
تنازع معمولی واقعے پر ایک چائے کی دکان پر ہوا، جھگڑے کے حوالے سے پنجاب حکومت نے اطلاع دی۔ ڈسٹرکٹ انتظامیہ نے فوری کارروائی کرتے ہوئے ملزمان کو گرفتارکر لیا۔
ترجمان دفتر خارجہ کا کہنا ہے کہ واقعے کو مذہبی رنگ دینے کی کوششیں غلط ہیں، اہم بات یہ ہے کہ گوردوارہ کو کسی قسم کا نقصان نہیں پہنچا، انتشاراور مقدس مقام کی بے حرمتی کے دعوے جھوٹے اور شرارت پر مبنی ہیں۔
ترجمان کے مطابق حکومت پاکستان اقلیتوں کو تحفظ فراہم کرنے کیلئے پرعزم ہے، کرتار پور راہداری کا افتتاح قائد اعظم کے اقلیتوں سے متعلق ویژن کا ایک مظہر ہے۔
