لیجنڈری اداکار نصیر الدین شاہ نے انکشاف کیا ہے کہ انہوں نے بالی ووڈ فلمیں دیکھنا چھوڑ دی ہیں اور انہیں فلمیں بالکل پسند نہیں ہے۔

بھارتی میڈیا رپورٹس کے مطابق نئی دہلی میں اردو لٹریچر فیسٹیول میں گفتگو کرتے ہوئے نصیر الدین شاہ نے فلمسازوں پر طنز کرتے ہوئے کہا کہ وہ گزشتہ 100 سالوں سے ایک ہی قسم کی فلمیں بنارہے ہیں۔

انہوں نے کہا کہ ہم یہ کہتے ہوئے فخر محسوس کرتے ہیں کہ ہندی سنیما 100 سال پرانا ہے لیکن ہم ایک جیسی فلمیں بنا رہے ہیں یہ واقعی مایوس کن ہیں۔

اداکار نے کہا کہ بیرون ملک رہنے والے ہندوستانی بالی ووڈ فلمیں ضرور دیکھتے ہیں کیونکہ یہ انہیں اپنے ملک کی یاد دلاتی ہیں لیکن بہت جلد ہی وہ بھی ایسی فلموں سے تنگ آجائیں گے کیونکہ ان فلموں کا مواد اچھا نہیں ہے۔

نصیر الدین شاہ نے کہا کہ ہندی سنیما کے لیے امید صرف اسی صورت میں ہے جب ہم انہیں پیسہ کمانے کے ذریعے کے طور پر دیکھنا چھوڑ دیں لیکن مجھے لگتا ہے کہ اب بہت دیر ہوچکی ہے، اب کوئی حل نہیں ہے کیونکہ جو فلمیں ہزروں دیکھ رہے ہیں وہ بنتی رہیں گی لوگ دیکھتے رہیں گے۔

انہوں نے کہا کہ جو لوگ سنجیدہ فلمیں بنانا چاہتے ہیں یہ ان کی ذمہ داری ہے کہ وہ آج کی حقیقت کو ظاہر کریں۔

کام کے محاذ پر نصیر الدین شاہ کرن جوہر کی متوقع ویب سیریز ’شو ٹائم‘ میں نظر آئیں گے۔