کراچی: وزیر اطلاعات سندھ ناصر حسین شاہ کا کہنا ہے کہ کرونا وبا سے بچنے کے لیے ضروری ہے کہ شب برأت کے موقع پر لوگ گھروں میں رہ کر عبادت کریں اور کرونا سے نجات کی بھی دعا مانگیں۔
تفصیلات کے مطابق صوبائی وزیر اطلاعات ناصر حسین شاہ نے اے آر وائی نیوز کے پروگرام ’الیونتھ آور‘ میں گفتگو کرتے ہوئے کہا کہ عوام سے درخواست ہے احتیاط کریں اور انفرادی عبادت کریں، زندگی میں کبھی ایسے حالات نہیں دیکھے، لوگوں کو محفوظ رکھنے کے لیے ایسے سخت اقدامات اٹھائے جارہے ہیں۔
انہوں نے کہا کہ طبی ماہرین بھی یہی رائے رکھتے ہیں کہ سماجی فاصلے رکھیں، صوبائی وزیر اطلاعات کا کہنا تھا کہ قبرستان بند ہوں گے لوگوں کو جمع ہونے نہیں دیا جائے گا۔
ناصر حسین شاہ نے کہا کہ لوگ گھروں میں کرونا وبا سے چھٹکارے کے لیے بھی دعا کریں، آج وزیراعلیٰ سندھ خود دورے پر نکلے تھے اور حالات کا جائزہ لیا، مراد علی شاہ نے ہدایت کی کہ لاک ڈاؤن پر سختی سے عمل کیا جائے۔
مزید پڑھیں: وزیراعلیٰ سندھ کا سڑکوں اور دکانوں پر رش پر اظہار برہمی
وزیر اطلاعات سندھ نے مزید کہا کہ لوگوں سے گزارش کرتے ہیں یہ تکلیف دہ وقت ہے، لاک ڈاؤن پر عمل کریں۔
دوسری جانب ایڈیشنل آئی جی کراچی غلام نبی میمن کا کہنا ہے کہ شب برأت پر شہری گھروں میں عبادت کریں، قبرستانوں پر لوگوں کو جمع ہونے کی اجازت نہیں ہوگی۔
ایڈیشنل آئی جی کا کہنا تھا کہ مساجد میں بھی شہری جانے سے گریز کریں، نیاز کی تقسیم میں بھی لوگوں کا رش نہ لگایا جائے۔
یاد رہے کہ شب برأت کے حوالے سے پولیس اور مقامی انتظامیہ نے خصوصی منصوبہ بندی کرتے ہوئے لوگوں کو جمع ہونے سے روکنے کے لیے جامع پلان ترتیب دے دیا ہے۔
