کراچی : عدالتی حکم پر مسمار کیے جانے والی رہائشی عمارت نسلہ ٹاور کی این او سی اور نقشے کی پریزنٹیشن کس نے دی تھی،اس حوالے سے اے آر وائی نیوز تفصیلات سامنے لے آیا۔
اس حوالے سے ذرائع کا کہنا ہے کہ نسلہ ٹاور کے گرؤانڈ پلس پندرہ فلور کی پریزنٹیشن اٹھائیس فروری دو ہزار تیرہ کو سندھ بلڈنگ کنٹرول اتھارٹی (ایس بی سی اے) کے افسران پر مبنی کمیٹی کو پیش کی گئی۔
مذکورہ دستاویز پریزنٹین آرکیٹیکٹ تحسین احمد اور انجینئیر یعقوب چھوٹانی نے پیش کی، نسلہ ٹاور کی اپروول کے لیے بنائی گئی پریزنٹیشن ایس بی سی اے کی چھ رکنی افسران پر بنائی گئی کمیٹی کو پیش کی گئی۔
کمیٹی کی سربراہی اس وقت کے ڈی جی ایس بی سی اے منظور قادر عرف کاکا نے کی، کمیٹی میں اس وقت کےڈائریکٹر اسٹرکچر علی مہدی، ڈائریکٹر جمشید ٹاؤن صفدر مگسی، ڈپٹی ڈائریکٹر ٹی پی اینڈ آر علی غفران اور ڈپٹی ڈائریکٹر ڈیزائن فرحان قیصر شامل تھے۔
ذرائع کا کہنا ہے کہ ٹاؤن پلاننگ اور دیگر محکموں سے اپروول کے بعد حتمی منظوری کے لیے معاملہ ڈی جی ایس بی سی اے کے پاس گیا جس کے بعد منظور قادر نے نقشے اور تعمیرات کی حتمی منظوری دی۔
