ابو ظہبی: متحدہ عرب امارات کے دارالحکومت ابو ظہبی میں نسوار اسمگل کرنے کی کوشش ناکام بنا دی گئی، نسوار ڈیزل ٹینکر کے ذریعے اسمگل کی جارہی تھی۔
اماراتی خبر رساں ادارے کے مطابق ابو ظہبی میں پولیس نے ڈیزل ٹینکر کے ذریعے بڑی مقدار میں نسوار اسمگل کرنے کی کوشش ناکام بناتے ہوئے ڈرائیور کو گرفتار کرلیا۔
پولیس کے مطابق ملزم پیٹرول سپلائی کرنے والی کمپنی میں ڈیزل ٹینکر کا ڈرائیور تھا جو 750 کلو گرام نسوار ٹینکر میں چھپا کر اسے ابو ظہبی لانے کی کوشش کر رہا تھا۔ ابو ظہبی کرائم برانچ کے ذرائع کا کہنا ہے کہ انہیں اطلاع ملی تھی کہ بڑی مقدار میں نسوار اسمگل کرنے کی کوشش کی جا رہی ہے۔
نسوار لائے جانے کی اطلاع پر کرائم برانچ کی ٹیم بڑے پیمانے پر تفتیش شروع کرتے ہوئے اسمگلر تک پہنچی، ملزم کو اسمگل کی جانے والی 750 کلو گرام نسوار کے ساتھ حراست میں لے کر ممنوعہ مواد اسمگل کرنے کا مقدمہ درج کرلیا گیا۔
ابو ظہبی پولیس ذرائع کا کہنا ہے کہ نسوار ممنوعہ اشیا میں شامل ہے جس کی تجارت یہاں ممنوع ہے۔
ابو ظہی پولیس کے شعبہ انسداد جرائم کے ریجنل ڈائریکٹر کرنل محمد سہیل الراشدی کا کہنا تھا کہ نسوار کی اسمگلنگ کی کارروائی کو ناکام بنانے کے لیے کرائم برانچ کے ساتھ بلدیہ ابو ظہی اور دیگر ادارے کے اہلکار بھی شامل تھے جن کی جامع کارروائی کے نتیجے میں نسوار کی بڑی کھیپ کو ضبط کرلیا گیا۔
