شوبز انڈسٹری کی اداکارہ نتاشہ علی کا کہنا ہے کہ اداکاری کی وجہ سے والدہ دو سال تک ناراض رہی تھیں۔
اے آر وائی ڈیجیٹل کے رئیلٹی شو تماشہ ٹو سے مشہور ہونے والی اداکارہ نتاشہ علی نے حال ہی میں نجی ٹی وی کے شو میں شرکت کی اور نجی زندگی سے متعلق اظہار خیال کیا۔
نتاشہ علی نے بتایا کہ انہوں نے 9ویں جماعت سے ہی اداکاری کرنا شروع کردی تھی جس کی وجہ سے والدہ دو سال تک ان سے ناراض رہیں۔
ان کا کہنا تھا کہ ’جب میں کام کے سلسلے میں کراچی شفٹ ہوئی تو والدہ نے دیکھا کہ میں اکیلے رہ کر بھی اچھے طریقے سے کام کر رہی ہوں، جس کے بعد امی مان گئیں لیکن انہیں راضی کرنے میں بہت وقت لگا۔‘
نتاشہ نے اپنی شادی سے متعلق بات کرتے ہوئے کہا کہ ان کی شادی لاک ڈاؤن میں ہوئی تھی۔
ان کا کہنا تھا کہ ’لاک ڈاؤن کے دوران انتہائی سادگی سے شادی ہوئی تھی، حالات یہاں تک پہنچ گئے تھے کہ میرے نکاح کے 10 دن بعد شادی کا فوٹوشوٹ کروایا۔‘
یاد رہے کہ نتاشہ علی نے اس سے قبل اے آر وائی زندگی کے پروگرام ’دی نائٹ شو ودھ ایاز سموں‘ میں شرکت کرتے ہوئے کہا تھا کہ ’جب میں نویں جماعت میں تھی تو امتحان سر پر تھے مجھے میٹرک میں پروموٹ ہونا تھا لیکن فیل ہوگئی تھی کیونکہ ان دنوں دو ڈرامے ایک ساتھ کر رہی تھی۔‘
چھوٹی عمر میں اداکاری شروع کرنے کی وجہ سے بتاتے ہوئے انہوں نے کہا تھا کہ ’بس مجھے بہت شوق تھا کہ اداکارہ بنوں اور یہ شوق عظمیٰ گیلانی، فریال گوہر، شگفتہ اعجاز کے ڈرامے دیکھ کر ہوا تھا۔‘
اداکارہ نے کہا تھا کہ وہ فیل ہوگئی تھیں لیکن پڑھائی جاری رکھی اور پھر گریجویشن مکمل کیا۔
واضح رہے کہ نتاشہ علی نے حال ہی میں اے آر وائی ڈیجیٹل کے رئیلٹی شو ’تماشہ ٹو‘ میں شرکت کی تھی۔
