واشنگٹن: امریکا میں خفیہ دستاویزات کی برآمدگی کے واقعات پر نیشنل آرکائیو نے نوٹس لیتے ہوئے سابق امریکی صدور اور نائب صدور کو خطوط لکھ دیے ہیں۔
روئٹرز کے مطابق نیشنل آرکائیوز نے جمعرات کو ڈونلڈ ٹرمپ، بارک اوباما، جارج بش، بل کلنٹن، مائیک پنس، ایل گور اور دیگر کو خطوط بھیجے ہیں، جن میں ان سے کہا گیا ہے کہ صدارتی ریکارڈز ایکٹ کی تعمیل کو یقینی بنائیں۔
نیشنل آرکائیوز کے خطوط میں لکھا گیا ہے کہ مدت ختم ہونے پر دور صدارت کا ریکارڈ نیشنل آرکائیوز کے حوالے کیا جائے۔
واضح رہے کہ امریکی صدر جو بائیڈن، سابق صدر ڈونلڈ ٹرمپ اور سابق نائب صدر مائیک پنس کے گھروں سے خفیہ دستاویزات ملنے پر یہ خطوط لکھے گئے ہیں، خفیہ دستاویزات کی برآمدگی کے معاملے پر کانگریس میں تحقیقات بھی جاری ہیں۔
خط میں درخواست کی گئی ہے کہ سابق رہنما اپنی فائلوں کی جانچ پڑتال کریں تاکہ یہ یقینی بنایا جا سکے کہ ذاتی سمجھے جانے والے مواد میں نادانستہ طور پر صدارتی ریکارڈ تو موجود نہیں، جسے قانون کے مطابق قومی آرکائیوز کے حوالے کرنے کی ضرورت ہو۔
