اسلام آباد: قومی اسمبلی کے آج ہونے والے اجلاس میں اہم بل پیش کیےجائیں گے، الیکشن ایکٹ2017 میں مزید ترمیم کا بل ایجنڈے میں شامل ہیں۔
تفصیلات کے مطابق حکومت نے پی ٹی آئی کی مخصوص نشستیں روکنے کیلئے الیکشن ایکٹ میں مزید ترمیم کی تیاری کرلی۔
قومی اسمبلی کااجلاس آج شام پانچ بجے ہوگا، اجلاس کا 43 نکاتی ایجنڈا جاری کردیا گیا ہے۔
اجلاس میں اہم بل پیش کیے جائیں گے، الیکشن ایکٹ2017 میں مزید ترمیم کا بل ایجنڈے میں شامل ہیں۔
الیکشن ایکٹ میں ترمیم کا بل پرائیویٹ ممبر بل کے طور پر پیش کیا جائے گا ، بل حکومتی رکن بلال اظہرکیانی اور زیب جعفر پیش کریں گے۔
ذرائع نے بتایا کہ بل کے تحت کسی رکن کیلئےجمع کرائے گئے ڈیکلیریشن کو تبدیل کرنے پر پابندی ہوگی۔
الیکشن کمیشن کی جانب سے 39 پی ٹی آئی ارکان کے نوٹیفکیشن جاری کیے گئے تھے اور سپریم کورٹ کے فیصلے کے بعد41 پی ٹی آئی ارکان کے نوٹیفکیشن جاری کرنا باقی ہیں۔
اس کے علاوہ ایجنڈے میں توہین عدالت سے متعلق قانون کی منسوخی اور آرٹیکل 184 میں ترمیم سے متعلق آئینی ترمیمی بل بھی شامل ہے۔
اجلاس میں جے یو آئی کے نور عالم خان سول سروینٹس ایکٹ 1973ء سمیت آئین کے مختلف آرٹیکلز میں ترمیم کا بل بھی پیش کریں گے۔
