اسلام آباد : قومی اسمبلی کا اجلاس 21 اگست کو بلانے کا فیصلہ کرلیا گیا ، صدر مملکت عارف علوی نئے پارلیمانی سال پرخطاب کریں گے ۔
تفصیلات کے مطابق اہم ملکی و قومی امور سمیت عوامی مفاد کیلئے قانون سازی کے معاملے پر قومی اسمبلی کا اجلاس 21 اگست کوبلانے کا فیصلہ کرلیا ہے ، وزارت پارلیمانی امور نے سمری صدر مملکت کو ارسال کر دی ہے۔
20اگست کو نئے پارلیمانی سال کا آغاز ہو گا، صدر مملکت عارف علوی نئے پارلیمانی سال پرخطاب کریں گے ۔
وزارت پارلیمانی امور کے حکام کا اہم اجلاس ہوا ، جس میں مشیر پارلیمانی اموربابراعوان،سیکریٹری،ڈپٹی سیکریٹری،عملہ شریک ہوئے ، اجلاس میں نئے پارلیمانی سال کیلئے کیلنڈر تیار کر لیا گیا ہے۔
اب سے قومی اسمبلی کا اجلاس ہر ماہ باقاعدگی سے ہو گا ، فیصلہ آئینی خلاپیدا ہونے سے بچانے کیلئے کیا گیا۔
یاد رہے گذشتہ ہفتے وزیراعظم عمران خان اور مشیر پارلیمانی امور بابر اعوان کے درمیان رابطہ ہوا تھا ، جس میں اہم ملکی و قومی امور سے متعلقہ قانون سازی پر مشاورت کی گئی تھی۔
رابطہ میں فیصلہ کیا گیا تھا کہ پارلیمنٹ کا مشترکہ اجلاس بھی بلایا جائے گا۔پچھلے مشترکہ اجلاس میں رہ جانے والی قانون سازی کو مکمل کیا جائے گا،ججوں کی تعداد میں اضافے سمیت ہیلتھ ریفارمز اور دیگر اہم بل پیش ہوں گے۔
بعد ازاں مشیر پارلیمانی امور نے اہم ترین قانونی و آئینی معاملات کی تیاری شروع کر دی تھی اور کہا تھا کہ وزارت پارلیمانی امور اجلاس بلانے کی سمری صدر مملکت کو ارسال کرے گی۔
