لاہور: قومی کرکٹ ٹیم آسٹریلیا روانگی کے لیے علامہ اقبال انٹرنیشنل ایئرپورٹ پہنچ گئی، آسٹریلیا کے خلاف 3 ٹی ٹوینٹی میچز کے لیے ٹیم میں 16 کھلاڑی شامل ہیں۔
تفصیلات کے مطابق قومی کرکٹ ٹیم آسٹریلیا روانگی کے لیے لاہور ایئرپورٹ پہنچ گئی، قومی ٹیم آسٹریلیا سے 3 ٹی ٹوینٹی اور دو ٹیسٹ میچ کھیلے گی۔
میزبان ٹیم آسٹریلیا کے خلاف پہلا ٹی ٹوئنٹی میچ 3 نومبر، دوسرا 5 اور تیسرا 8 نومبر کو کھیلا جائے گا، قومی ٹیم ٹی ٹوینٹی سیریز سے قبل 31 اکتوبرکو وارم اپ میچ کھیلے گی۔
آسٹریلیا کے خلاف 3 ٹی ٹوینٹی میچز کے لیے قومی کرکٹ ٹیم میں 16 کھلاڑی شامل ہیں، بابر اعظم قومی ٹی ٹوینٹی ٹیم کی قیادت کریں گے۔
آسٹریلیا کے خلاف ٹی ٹوینٹی سیریز کے لیے پاکستانی اسکواڈ میں بابراعظم، آصف علی، فخرزمان، حارث سہیل، محمد حسنین، افتخاراحمد،عماد وسیم، امام الحق، خوشدل شاہ، محمدعامر، محمدعرفان، محمدرضوان، موسی خان، شاداب خان، عثمان قادر اور وہاب ریاض شامل ہے۔
یاد رہے کہ گزشتہ روز میڈیا سے گفتگو کرتے ہوئے بابراعظم کا کہنا تھا کہ دورہ آسٹریلیا کے دوران سرفراز احمد کی کمی محسوس ہوگی، ان کی بڑی خدمات ہیں، ان کے دور میں ٹیم نمبر ون بنی۔
بابراعظم کا کہنا تھا کہ وہ فخر زمان کے ساتھ اوپننگ کریں گے جبکہ امام الحق بیک اپ اوپنر ہیں۔
