لاہور: قومی کرکٹ ٹیم کے کھلاڑیوں کا فٹنس ٹیسٹ نیشنل کرکٹ اکیڈمی لاہور میں جاری ہے۔ بیماری اور انفیکشن کے باعث عثمان شنواری، اظہر علی، اسد شفیق اور محمد رضوان کا ٹیسٹ نہیں ہوسکا۔
تفصیلات کے مطابق سینٹرل کنٹریکٹ میں شامل کھلاڑیوں کے فٹنس ٹیسٹ دو روز تک لیے جائیں گے جس میں کھلاڑیوں کی فٹنس کا مختلف زاویوں سے جائزہ لیا جائے گا۔
ٹائیفائیڈ کے باعث فاسٹ بولرعثمان شنواری کا ٹیسٹ دوسرے مرحلے میں ہوگا۔ جبکہ وائرل انفیکشن کے باعث اظہر علی، اسد شفیق اور محمد رضوان کے ٹیسٹ بھی بعد میں لیےجائیں گے۔
پی سی بی کا فٹنس ٹیسٹ پاس نہ کرنے والے کرکٹرز پر جرمانہ عائد کرنے کا فیصلہ
قومی کرکٹ ٹیم کے 2 روزہ فٹنس ٹیسٹ کا آغاز ہوگیا ہے اور اب غیر معیاری فٹنس رکھنے کھلاڑیوں پر جرمانہ بھی ہوگا۔ نیشنل کرکٹ اکیڈمی میں پہلے روز 10 کرکٹرز نے رپورٹ کی۔ ٹرینر یاسر ملک نے بابراعظم، حارث سہیل، سرفراز احمد، امام الحق، محمد عباس، شاہین آفریدی، شان مسعود، عابد علی، عماد وسیم اور یاسر شاہ کی فٹنس کا جائزہ لیا۔
جبکہ محمد عامر، وہاب ریاض اور شاداب خان بنگلادیش پریمیئر لیگ سے واپسی پر 20 جنوری کو ٹیسٹ دیں گے۔
فخر زمان اور حسن علی کا فٹنس ٹیسٹ میڈیکل رپورٹس کلئیر آنے پر ہوگا جس کرکٹرکی فٹنس مطلوبہ معیار کے مطابق نہیں ہوگی اس کی تنخواہ میں سے 15 فی صد کٹوتی ہوگی۔
