اسلام آباد: نیشنل پارٹی کا آئینی ترامیم کا مجوزہ مسودہ منظر عام پر آگیا جو پارلیمنٹ کی خصوصی کمیٹی میں سینیٹر جان محمد بلیدی کی جانب سے پیش کیا گیا۔
نیشنل پارٹی کے مسودے میں بلوچستان اسمبلی کی نشستوں کی تعداد 65 سے بڑھا کر 101 کرنے اور آئین کے آرٹیکل 106 میں ترمیم کی تجویز ہے۔
اس میں بلوچستان اسمبلی کی جنرل نشستوں کی تعداد 80 کرنے، اسمبلی میں خواتین کی نشستوں کی تعداد 17 کرنے اور اقلیتوں کی مخصوص نشستیں بڑھا کر 4 کی کرنے کی تجویر بھی شامل ہے۔
خورشید شاہ کی زیرِ صدارت پارلیمنٹ کی خصوصی کمیٹی کا اجلاس ہوا تھا جس میں شرکا نے 26ویں آئینی ترامیم کے مسودے پر غور کیا۔
اجلاس میں عرفان صدیقی، رانا تنویر، شیری رحمان، فاروق ستار، ایمل ولی خان، خالد مگسی، سینیٹر جان محمد اجلاس میں شریک ہوئے تھے۔
ذرائع کے مطابق پی ٹی آئی کا کوئی رکن خصوصی کمیٹی کے اجلاس میں شریک نہیں ہوا۔
خصوصی کمیٹی کا اجلاس کل دوپہر ساڑھے 12 بجے تک ملتوی کر دیا گیا۔ کمیٹی کل آئینی ترامیم کے مسودے کو حتمی شکل دے گی تاہم اس سے قبل نظریں لاہور کے آج کے اجلاس پر ہیں۔
حتمی فیصلہ نواز شریف، مولانا فضل الرحمان، صدر مملکت آصف علی زرداری اور بلاول بھٹو کی ملاقات میں ہوگا۔
آئینی ترامیم کا مسودہ کابینہ سے منظوری کے بعد سینیٹ میں پیش ہوگا جبکہ وہاں سے منظوری کے بعد مسودہ قومی اسمبلی میں پیش ہوگا۔
