اسلام آباد: قومی بچت اسکیمز میں سرمایہ کاری کرنے والوں کے لیے بڑی خبر آگئی ، حکومت اسکیمز پر شرح منافع کے حوالے سے اعلان کردیا۔
تفصیلات کے مطابق ملک میں افراطِ زر کی شرح میں کمی کے پیش نظر قومی بچت کی مختلف اسکیموں پر منافع کی شرح میں کمی کا اعلان کر دیا ہے۔
اس سلسلے میں نوٹیفکیشن جاری کردیا گیا ، جس کے مطابق نئی شرح کا اطلاق 21 مئی 2025 سے ہوگا۔
سرکاری نوٹیفکیشن کے تحت منافع کی شرح میں ایک فیصد تک کمی کی گئی ہے تاہم مختلف سیونگز اسکیموں کی شرح الگ الگ ہیں۔
حکام کا کہنا ہے کہ افراط زر کی موجودہ رفتار اور مالیاتی پالیسی کے رجحان کو مدنظر رکھتے ہوئے یہ فیصلہ کیا گیا ہے۔
ماہرین معاشیات کے مطابق اس اقدام کا مقصد مہنگائی کے دباؤ کو کنٹرول میں رکھنے کے ساتھ ساتھ معیشت میں توازن پیدا کرنا ہے۔
سیونگ اکاؤنٹس پر منافع کی شرح میں ایک فیصد کمی ہوئی ہے جو اب 9.5 فیصد پر ہے جبکہ اسپیشل سیونگز سرٹیفکیٹس پر منافع میں 30 بیسز پوائنٹس کمی کر کے 10.9 فیصد کر دیا گیا۔
سرمایہ کاری کی نئی شرح
خصوصی بچت کا سرٹیفکیٹ 11.20 فیصد ، ڈیفنس سیونگ سرٹیفکیٹ 12.12 فیصد ، باقاعدہ آمدنی کا سرٹیفکیٹ 11.70 فیصد ، بچت اکاؤنٹ کی شرح 10.50 فیصد ہوگئی ہے۔
اس کے علاوہ پنشنرز بینیفٹ اکاؤنٹ ، بہبود سیونگ سرٹیفکیٹ اور شہدا فیملی ویلفیئر اکاؤنٹ پر 13.68 فیصد جبکہ سرو اسلامک ٹرم اکاؤنٹ اور سرو اسلامک سیونگ اکاؤنٹ 10.44 فیصد شرح ہے۔
ڈائریکٹوریٹ کے عہدیداروں نے وضاحت کی کہ یہ نظرثانی موجودہ افراط زر کے رجحانات اور مرکزی بینک کی مانیٹری پالیسی کے مطابق ہے، جس کا مقصد بچت کرنے والوں کے لیے منافع کو متوازن کرتے ہوئے مالی استحکام کو برقرار رکھنا ہے۔
