اسلام آباد: وزیراعظم کے مشیر برائے قومی سلامتی ناصر جنجوعہ دورہ ایران مکمل کرکے وطن واپس پہنچ گئے۔
ایران کے دورے کے دوران لیفٹینٹ جنرل ریٹائرڈ ناصر جنجوعہ نے ایرانی ہم منصب علی شامخانی، وزیرداخلہ اور مسلح افواج کے سربراہ سے ملاقاتیں کیں، جس میں باہمی دلچسپی کے امور،دہشتگردی کے خلاف جنگ اور خطے میں امن و استحکام پر تبادلہ خیال ہوا۔
مشترکہ اعلامیہ میں کہا گیا ہے کہ فریقین نے اتفاق کیا کہ ایران پر عالمی پابندیاں ختم ہونے سے دونوں ممالک کے درمیان معاشی تعاون کی نئی راہیں کھلی ہیں۔ اعلامیے میں مزید کہا گیا ہے کہ دونوں ملک سکیورٹی معاملات خصوصاً سرحدی سیکورٹی کو خاص اہمیت دیتے ہیں اور اس کے لئے مشترکہ کمیشن سمیت مربوط میکنزم بنانے پر اصولی اتفاق کیا گیا ہے اور اس ضمن میں دونوں ملک مزید بات چیت جاری رکھیں گے۔
جاری کردہ اعلامیہ میں بتایا گیا ہے کہ دونوں ممالک نے مسلم امہ کے اتحاد اور داعش سمیت مشترکہ خطرات سے ملکر نمٹنے پر زور دیا ہے۔
