قومی سلامتی کمیٹی اجلاس میں اقوام متحدہ کے چارٹر کے تحت ایران کے دفاع کے حق کو تسلیم کیا گیا اور امریکی حملے کی مذمت کی گئی۔
وزیراعظم شہباز شریف کی زیر صدارت قومی سلامتی کمیٹی اجلاس کا اعلامیہ جاری کردیا گیا ہے جس میں ایران کے خلاف اسرائیلی جارحیت کے بعد خطے کی بدلتی صورت حال کا جائزہ لیا گیا۔
کمیٹی نے اسرائیل کے جارحانہ اقدامات کی شدید مذمت اور افسوس کا اظہار کرتے ہوئے کہا کہ حملے اس وقت کیے گئے جب ایران اور امریکا کے درمیان تعمیری مذاکراتی عمل جاری تھا، غیر ذمہ دارانہ کارروائیوں نے خطے میں کیشدگی میں اضافہ کیا۔
قومی سلامتی کمیٹی میں کہا گیا کہ کشیدگی میں اضافہ خطے میں بڑے تنازع کو ہوا دے سکتا ہے، کشیدتی بات چیت و سفارت کاری کے امکانات کو کم کررہی ہے۔
ایران اسرائیل جنگ سے متعلق تازہ ترین خبریں
اعلامیے میں کہا گیا ہے کہ جارحیت پر مبنی اقدامات کے خطے میں کشیدگی کو فروغ دیا، اسرائیلی جارحیت نے بڑی جنگ کے خطرے کو بڑھا دیا ہے، کمیٹی نے ایران کی حکومت اور عوام سے معصوم جانوں کے ضیاع پر اظہار ہمدردی کیا۔
کمیٹی کا کہنا ہے کہ نیوکلیئر اثاثوں پر اسرائیلی حملے آْئی اے ای اے اور یو این چارٹر کی خلاف ورزی ہیں، کمیٹی نے ایرانی جوہری تنصیبات پر حملوں کے بعد ممکنہ بگڑتی صورت حال پر تشویش کا اظہار کیا۔
قومی سلامتی کمیٹی نے تمام متعلقہ فریقین سے مطالبہ کیا کہ تنازع کو سفارت کاری سے حل کیا جائے، کمیٹی نے عالمی انسانی حقوق اور انسانی ہمدردی کے قوانین کی پاسداری پر بھی زور دیا۔
