کراچی: انگلش بورڈ کا سیکیورٹی وفد آج نیشنل اسٹیڈیم کا جائزہ لے گا۔
تفصیلات کے مطابق انگلش کرکٹ بورڈ کا سیکیورٹی وفد آج دوپہر نیشنل اسٹیڈیم کا دورہ کرے گا، 4 رکنی وفد میں رچرڈ اسنوبال، رابرٹ لنچ، جان کار اور ریج ڈکاسن شامل ہیں۔
سیکیورٹی وفد اسٹیڈیم کے مختلف مقامات کا جائزہ لے گا، اس موقع پر پی سی بی سیکیورٹی آفیشل اور اسٹیڈیم کی انتظامیہ انتظامات پر بریفنگ دے گی۔
ایئر پورٹ سے ہوٹل تک اور ہوٹل سے اسٹیڈیم کے روٹ کا بھی جائزہ لیا جائے گا، اسٹیڈیم میں سیکیورٹی وفد کی قانون نافذ کرنے والے اداروں سے میٹنگ بھی شیڈول ہے۔
کراچی کے بعد سیکیورٹی وفد لاہور اور ملتان میں بھی انتظامات کا جائزہ لے گا۔
انگلش بورڈ کے سیکیورٹی وفد کی پاکستان آمد
واضح رہے کہ انگلش ٹیم رواں سال 7 ٹی ٹوئنٹی میچز اور 3 ٹیسٹ میچز کے لیے پاکستان آئے گی، تاہم حتمی شیڈول کا فیصلہ سیکیورٹی وفد کی رپورٹ کی بنیاد پر ہوگا۔
آسٹریلیا کے کامیاب دورہ پاکستان کے بعد غیر ملکی ٹیموں کے سیکیورٹی خدشات ختم ہو چکے ہیں، اور بین الاقوامی ٹیمیں اب پاکستان کا دورہ کرنے میں دل چسپی رکھتی ہیں۔
