لاہور: پاکستان میں پولیو وائرس کے مکمل خاتمے کے لیے ملک بھر میں پولیو ویکسین پلانے کی مہم پھر شروع کردی گئی ہے۔
تفصیلات کے مطابق کل سے شروع ہونے والی پولیو خاتمے کی رواں سال کی دوسری مہم میں حکومت پاکستان اور اس کے پارٹنرز کی جانب سے پانچ سال کی عمر کے تقریباً چار کروڑ بچوں کو ویکسین پلائی جائے گی۔ ایک ہفتے پر محیط اس مہم کے تحت دو لاکھ ساٹھ ہزار رضا کار اور کارکنان گھر گھر جاکر اس بات کو یقینی بنائیں گے کہ پانچ سال سے کم عمر کے ہر بچے کو پولیو کے قطرے پلائے جاہیں۔
مہم کے سلسلے میں پاکستان کے قومی کوآرڈینیٹر محمد صفدر کا کہنا ہے کہ ہم اس بیماری کے خاتمے کے بہت قریب پہنچ چکے ہیں، ہم چاہتے ہیں کہ عوام اس مہم کی حمایت کی صورت میں ہماری مدد کریں۔ یہ ایک اجتماعی ذمہ داری ہے اس لیے اپنے خاندان اور برادری میں ہر بچے کو پولیو سے بچانے کے لیے ویکسین ضرور پلوائیں۔
پولیو کے خاتمے کے لیے وزیر اعظم کی طرف سے نمائندگی کرنے والی خاتون سینیٹر عائشہ رضا فاروق نے لاہور میں افغان بستی کا دورہ کرتے ہوئے پولیو کے خاتمے کی مہم کا جائزہ لیا۔
کراچی میں سال2018 کی پہلی انسداد پولیو مہم کا آغاز
واضح رہے افغانستان اور نائجیریا کے بعد پاکستان تیسرا ملک ہے جہاں پولیو کا وائرس اب بھی موجود ہے۔ 2014 سے پولیو کیسز میں تیزی سے کمی آرہی ہے اور گزشتہ برس ملک میں صرف آٹھ کیسز سامنے آئے تھے جب کہ رواں برس اب تک ایک کیس سامنے آیا ہے۔
خیال رہے کہ پاکستان میں پولیو مہم کے خلاف کالعدم تحریک طالبان پاکستان کی طرف سے مسلسل کارروائیاں ہوتی رہی ہیں۔ متعدد پولیو رضاکار بچوں کو پولیو سے بچانے کی کوشش میں اپنی جانیں دے چکے ہیں۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
