نوشہرو فیروز : قوم پرست کارکنان نے مورو قومی شاہراہ پر 2 روز سے جاری دھرنا ختم کرنے کا اعلان کردیا۔ جس کے بعد ٹریفک کی آمدورفت بحال کردی گئی۔
اے آر وائی نیوز کی رپورٹ کے مطابق متوفی زاہد لغاری کی لاش پوسٹ مارٹم کیلئے نوابشاہ اسپتال منتقل کردی گئی، ورثاء کا کہنا ہے کہ انتظامیہ اپنی ہٹ دھرمی پر قائم رہی، ہمارا مقدمہ درج نہیں کیا۔
ورثاء نے کہا کہ وکلاء کی مشاورت کے بعد خود ہی دھرنا ختم کررہے ہیں، زاہد لغاری کے قتل کا مقدمہ درج کرنے کے لیے عدالت سے رجوع کریں گے۔
ورثا نے بتایا کہ لاش کے پوسٹ مارٹم کے بعد رات یا صبح تدفین کریں گے، ورثا نے کہا کہ عدالتوں پر یقین ہے کہ ہمیں انصاف ملے گا اور قتل کا مقدمہ پولیس و دیگر ملزمان کیخلاف درج کیا جائے گا۔
یاد رہے کہ گزشتہ روز پولیس اور مظاہرین کے درمیان جھڑپ کے نتیجے میں 3 پولیس اہلکاروں سمیت 7 افراد زخمی ہوئے، جن میں سے 1شخص زخموں کی تاب نہ لاتے ہوئے دم توڑ گیا تھا۔
واقعے کے بعد مشتعل مظاہرین نے وزیرداخلہ سندھ ضیاء لنجار کے گھر پر دھاوا بول دیا تھا، توڑ پھوڑ کی اور بعد ازاں گھر کو آگ لگا دی تھی۔
