اسلام آباد: سربراہ پاک بحریہ ایڈمرل ظفر محمود عباسی کی زیر صدارت کمانڈ اینڈ اسٹاف کانفرنس میں کشمیریوں سے مکمل یکجہتی کا اظہار کیا گیا۔
تفصیلات کے مطابق نیول ہیڈ کوارٹرز اسلام آباد میں پاک بحریہ کی کمانڈ اینڈ اسٹاف کانفرنس ہوئی۔ کانفرنس کی زیر صدارت سربراہ پاک بحریہ ایڈمرل ظفر محمود عباسی نے کی۔
کانفرنس میں پاک بحریہ کی آپریشنل تیاریوں، ترقیاتی منصوبوں اور سیکیورٹی صورتحال کا جائزہ لیا گیا۔ نیول چیف کو پاک بحریہ کے جاری اور مستقبل کے منصوبوں پر بریفنگ دی گئی۔
ترجمان پاک بحریہ کا کہنا ہے کہ کانفرنس میں کشمیر اور ملک کی مجموعی سیکیورٹی صورتحال کے تناظر میں کشمیریوں سے مکمل یکجہتی کا اظہار کیا گیا، نیول چیف نے پاک بحریہ کی آپریشنل تیاریوں پر اطمینان کا اظہار کیا۔
کانفرنس میں اس عزم کا اعادہ کیا گیا کہ پاک بحریہ کسی بھی صورتحال سے نمٹنے کے لیے ہمہ وقت تیار اور مستعد ہے۔
اس سے قبل ایڈمرل ظفر محمود عباسی نے کریکس اور کوسٹل ایریا میں بحریہ کی تنصیبات کا دورہ کیا تھا، نیول چیف نے اسپیشل سروس آپریشنل ٹریننگ سینٹر کا افتتاح بھی کیا تھا۔
نیول چیف نے یو اے وی لانچنگ سائٹ کا دورہ بھی کیا، نیول چیف کو لانچنگ سائٹ پر یو اے وی سسٹم پر بریفنگ دی گئی۔ نیول چیف نے پاک بحریہ کی آپریشنل تیاریوں پر اطمینان کا اظہار کیا تھا۔
