نئی دہلی: سابق بھارتی کرکٹر اور سیاست دان نوجوت سنگھ نے کہا ہے کہ پاکستان کا دورہ جنوبی بھارت جانے سے زیادہ اچھا لگا، جنوبی بھارت اجنبی سا لگتا ہے۔
بھارتی میڈیا کے مطابق کاسول میں ایک لٹریری فیسٹیول کے موقع پر گفتگو کرتے ہوئے نوجوت سنگھ سدھو نے کہا ہے کہ پاکستان کی زبان اور کھانا ہمارے جیسا ہی ہے، جنوبی بھارت میں بسنے والوں کی نہ زبان سمجھ آتی ہے اور نہ ہی ان کا کھانا مزیدار ہوتا ہے۔
سابق بھارتی کرکٹر نے کہا کہ پاکستان آرمی چیف کو گلے لگانا نہ تو کوئی سازش تھی اور نہ ہی کوئی رافیل ڈیل، پاکستان نے متعدد مرتبہ کرتارپور بارڈر کھولنے کی پیش کش کی مگر بھارتی سیاست دان اس معاملے میں سنجیدہ نہیں ہیں۔
دوسری جانب نوجوت سنگھ سدھو کے بیان کو لے کر بھارت میں نیا تنازع کھڑا ہوگیا اور انہیں شدید تنقید کا نشانہ بنایا جارہا ہے۔
بھارتی سیاسی جماعت کے ترجمان دلجیت سنگھ کا سدھو کے بیان پر کہنا ہے کہ بطور سیاست دان انہیں اپنے الفاظوں کو سوچ سمجھ کر استعمال کرنا چاہئے، دوسروں کی تعریف کرنے میں کوئی حرج نہیں لیکن جنوبی بھارت کو برا نہیں کہنا چاہئے۔
دلجیت سنگھ کو جواب دیتے ہوئے سدھو نے کہا کہ میں نے ایسا کچھ نہیں کیا جس سے کسی کو دکھ پہنچے بلاوجہ تنازع کھڑا کیا جارہا ہے۔
مزید پڑھیں: آرمی چیف نے سابق بھارتی کرکٹرنوجوت سنگھ سدھو کو گلے لگا لیا
یاد رہے کہ نوجوت سنگھ سدھو نے وزیراعظم پاکستان عمران خان کی تقریب حلف برداری کی تقریب میں شرکت کی تھی اور آرمی چیف جنرل قمر جاوید باجوہ کو گلے لگایا تھا جس پر انہیں بھارت میں شدید تنقید کا سامنا کرنا پڑا تھا۔
