سابق بھارتی کرکٹر و سیاست دان نوجوت سنگھ سدھو کو اہلیہ کے کینسر کی ڈائٹ بتانے پر سول سوسائٹی نے 850 کروڑ نوٹس بھیج دیا۔
بھارتی میڈیا رپورٹ کے مطابق سابق بھارتی کرکٹر نوجوت سنگھ سدھو اور ان کی اہلیہ نوجوت کور سدھو کو اپنے کینسر کے علاج سے متعلق دعوے پر 850 کروڑ روپے کا لیگل نوٹس موصول ہوا ہے۔
یہ نوٹس سابق کرکٹر کے دعویٰ کے چند دن بعد سامنے آیا ہے جس میں ان کا کہنا تھا کہ ان کی اہلیہ قدرتی علاج پر مشتمل غذا کے استعمال سے اسٹیج 4 کے کینسر سے صحت یاب ہوئی ہیں۔
بھات کی ریاست چھتیس گڑھ سول سوسائٹٰی نے نوجوت سنگھ سدھو کے ان دعوؤں پر نوٹس جاری کیا ہے جس نے سوشل میڈیا پر ہنگامہ کھڑا کردیا تھا۔
سول سوسائٹی نے نوٹس میں لکھا کہ سدھو نے کینسر کے علاج کے بارے میں غلط معلومات پھیلائیں اس لیے وہ سات دنوں کے اندر معافی مانگیں۔
نوٹس میں کہا گیا ہے کہ اگر سدھو اور ان کی اہلیہ نوجوت کور سدھو کینسر کے علاج کے بارے میں اپنے دعوے کو ثابت کرنے میں ناکام رہے تو ان کے خلاف قانونی کارروائی کی جائے گی۔
سی سی ایس کے کنوینئر ڈاکٹر کلدیپ سولنکی نے کہا کہ یہ کینسر کے مریضوں کو گمراہ کرسکتے ہیں اور ان کی صحت کو خطرے میں ڈال سکتے ہیں۔
بعدازاں نوجوت سنگھ سدھو نے اپنے بیان کی وضاحت کرتے ہوئے کہا کہ قدرتی علاج کے علاوہ اہلیہ کے علاج میں سرجری، کیموتھراپی اور ہارمونل تھراپی بھی شامل ہیں۔
انہوں نے بتایا کہ جن علاج کا حوالہ دیا تھا وہ ڈاکٹر کے مشورے سے لیا گیا ایک ضمنی اقدام تھا۔
