نواب شاہ: سندھ کے شہر نواب شاہ میں اس وقت شادی کی خوشیاں ماتم میں بدل گئیں جب باراتیوں کی ایک گاڑی کو ہولناک حادثہ پیش آیا اور 5 افراد جاں بحق ہو گئے۔
مقامی پولیس حکام کے مطابق نواب شاہ میں قاضی احمد قومی شاہراہ پر باراتیوں کی ڈاٹسن پک اپ اور ٹرک میں تصادم ہو گیا ہے، جس کے نتیجے میں 4 بچوں سمیت 5 افراد جاں بحق جب کہ 12 افراد شدید زخمی ہو گئے ہیں، 3 شدید زخمیوں کو تشویش ناک حالت میں پی ایم یو اسپتال نواب شاہ منتقل کر دیا گیا ہے۔
جاں بحق افراد کی شناخت صدورو سولنگی، غفورا سولنگی، افسانہ سولنگی، عابد سولنگی اور محمد علی کے ناموں سے ہوئی ہے، اطلاع ملتے ہی پولیس جائے وقوعہ پر پہنچ گئی تھی اور لاشوں اور زخمیوں کو تحصیل ہیڈ کوارٹر اسپتال قاضی احمد منتقل کیا گیا، جاں بحق ہونے والوں میں خاتون بھی شامل ہے۔
ڈاٹسن پک اپ باراتیوں کو لے کر دولت پور سے سکرنڈ جا رہی تھی جب حادثہ پیش آیا، پولیس نے ٹرالر تحویل میں لے کر ڈرائیور کو گرفتار کر لیا ہے۔
