سابق وزیراعظم اور پاکستان مسلم لیگ ن کے سربراہ میاں محمد نواز شریف نے کہا ہے کہ عوام کی آسانی میرے دل کا سکون ہے۔
تفصیلات کے مطابق پاکستان مسلم لیگ (ن) کے صدر محمد نواز شریف سے وفاقی وزیر توانائی سردار اویس خان لغاری نے ملاقات کی، اس موقعے پر نواز شریف نے بجلی کی قیمتوں میں کمی پر وفاقی وزیر توانائی کو مبارک دی۔
سابق وزیراعظم اور پاکستان مسلم لیگ ن کے سربراہ میاں محمد نواز شریف نے کہا کہ آئی ایم ایف پروگرام میں ہوتے ہوئے بجلی کی قیمتوں میں کمی آسان کام نہیں تھا لیکن اللہ تعالیٰ کا شکر ہے کہ عوام سے کئے گئے وعدے پورے ہو رہے ہیں۔
نواز شریف نے کہا کہ شہبازشریف اور ان کی ٹیم کو شاباش دیتاہوں، عوام کی آسانی میرے دل کا سکون ہے، ن لیگ نے عوام کے ریلیف، ملک کی خدمت کو ہمیشہ مقدم رکھا ہے اور ریلیف دینا ملکی خدمت ہی ہماری روایت ہے۔
دوسری جانب وفاقی وزیر سردار اویس لغاری نے کہا کہ آپ کی رہنمائی میں وزیراعظم اور انکی ٹیم کامیاب ہوئی ہے، ساتھ ہی اویس لغاری نے نوازشریف کو توانائی شعبے میں اصلاحات سے آگاہ کیا۔
اویس لغاری نے اوپن مارکیٹ کے قیام سے بجلی مزید سستی کرنے سے متعلق آگاہی دی اور بجلی چوری،گردشی قرض سے مستقل نجات پر اقدامات سے آگاہ کیا۔
