لاہور: پنجاب کے دارالحکومت سے تعلق رکھنے والے شہری میاں محمد نوازشریف نے اہل خانہ سمیت آئندہ عام انتخابات میں تحریک انصاف کے چیئرمین عمران خان کو ووٹ دینے کا اعلان کردیا۔
تفصیلات کے مطابق اے آر وائی کے پروگرام سرعام کے اینکر اور سینئر صحافی اقرار الحسن نے الیکشن سے متعلق عوامی رائے جاننے کے لیے لاہور اور پنجاب کے علاقوں کا دورہ کیا۔
اسی دوران اُن کو ایک شہری ملا جس کا نام صرف سابق وزیر اعظم سے نہیں ملتا بلکہ اُن کے گھر کے دیگر افراد نوازشریف کی صاحبزادی ، چھوٹے میاں صاحب اور بھتیجے کے ہم نام نکلے۔
اقرار الحسن سے گفتگو کرتے ہوئے شہری کا کہنا تھا کہ جس دن نوازشریف وزیر اعظم بنے میری پیدائش بھی اُسی روز کی ہے اس لیے گھر والوں نے یہی نام رکھا، میں مسلم لیگ ن کا بہت پرانا ووٹر تھا مگر اب ہماری پوری فیملی اگلے انتخابات میں عمران خان کو ووٹ دے گی۔
حیران کن طور پر شہری نوازشریف کی بیٹی کا نام مریم نواز جبکہ ماموں شہباز اور بھانجے کا نام حمزہ شہباز ہے۔ اے آر وائی نیوز سے گفتگو کرتے ہوئے میاں محمدنوازشریف نے تبدیلی کانعرہ لگایا۔
