ہمارا مقابلہ عمران یا آصف زرداری سے نہیں ہے، نوازشریف کا ساہیوال جلسے سے خطاب
عمران خان کے جلسے میں کے پی سے آنے والوں نے لاہور میں ہونے والی ترقی دیکھ لی: مریم نواز
ساہیوال: سابق وزیر اعظم نواز شریف نے کہا ہے کہ ہمارا مقابلہ عمران یا آصف زرداری سے نہیں ہے، بلکہ ایسی قوتوں کے ساتھ ہے جو نظر نہیں آتیں لیکن انھیں آپ سمجھتے ہیں۔
ساہیوال میں جلسہ عام سے خطاب کرتے ہوئے انھوں نے کہا کہ یہاں کے عوام کو اتنی بڑی تعداد میں دیکھ کر نشہ آرہا ہے، لگتا ہے ’ووٹ کو عزت دو‘ کا پیغام یہاں کے گھر گھر تک پہنچ گیا ہے۔ کل کا جلسہ دیکھ کر ایسا لگا تھا جیسے جلسہ لاہور کا، مجمع پشاور کا اور ایجنڈا کسی اور کا ہو۔
انھوں نے کہا کہ عمران خان کے نئے پاکستان میں سڑکیں ٹوٹی ہوئی ہیں، کچرا پڑا ہے، ترقیاتی کام نظرنہیں آرہے۔ انھوں نے کہا تھا کہ پچاس ہزارمیگا واٹ بجلی پیدا کریں گے، یہ بجلی کہاں ہے۔ پاکستان میں لوڈشیڈنگ اور دہشت گردی ن لیگ نے ختم کی، کراچی میں امن قائم کیا، سی پیک پاکستان لے کر آئے۔
نواز شریف نے اپنے خطاب میں کہا کہ مجھے واپس لانے کا ایک راستہ ہے، ن لیگ کو اتنے ووٹ دو کہ قانون اور اس کے فیصلے کو اٹھا کر باہر پھینکا جاسکے، آپ کا ووٹ قانونی فیصلوں کو ختم کرسکتا ہے۔ پاکستان کے علم کو اونچا رکھیں گے لیکن اپنی عزت کا سودا نہیں کریں گے۔
اب مقابلہ صرف پی ٹی آئی اور ن لیگ میں ہوگا،عمران خان
سابق وزیر اعظم نے کہا کہ رمضان شریف کے بعد الیکشن کی مہم شروع ہوجائے گی، اب الیکشن نہیں بلکہ ریفرنڈم ہوگا، اگلے ستر برس پاکستان کے عوام کے ہوں گے، میرا دل چاہتا ہے ساہیوال باربارآؤں، میں آپ کو اورآپ مجھے دیکھیں۔
مریم نواز شریف
ساہیوال جلسے سے خطاب کرتے ہوئے سابق وزیر اعظم نواز شریف کی صاحب زادی مریم نواز نے کہا کہ آپ ن لیگ کے شیر ہیں، آپ کمال کے لوگ ہیں۔ ساہیوال کے عوام نے عمران خان کو مسترد کردیا ہے۔
مریم نواز نے کہا کہ مخالفین اس لیے بار بار لاہور آتے ہیں کہ شاید پنجاب کے لوگ ان کی بات سن لیں، لاہورجلسے کے لیے کہا گیا تھا کہ جو سب سے زیادہ لوگ لائے گا ٹکٹ اس کو دیا جائے گا۔ لیکن یہ اچھی بات ہے کہ کے پی سے آنے والوں نے لاہور میں ہونے والی ترقی دیکھ لی۔
ساہیوال : ن لیگی ایم پی اے نے ہاکی گراؤنڈ کو شادی لان بنا دیا
انھوں نے عوام سے کہا کہ زرداری اور عمران خان ووٹ مانگنے آئیں تو ’زرداری عمران بھائی بھائی‘ کے نعرے سے ان کا استقبال کریں۔ عمران خان کا کردار ہر الیکشن میں مہمان اداکار کا ہوتا ہے، ان کی قسمت میں صرف استعمال ہونا لکھا ہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
