لاہور: میاں محمعد نواز شریف وزیر اعظم اور مریم نواز کے ہمراہ سعودی عرب نہ جا سکے۔
تفصیلات کے مطابق مسلم لیگ ن کے صدر نواز شریف کی طبیعت ناساز ہو گئی ہے، اور ڈاکٹروں نے انھیں مکمل آرام کا مشورہ دیا ہے۔
ذرائع کے مطابق سابق وزیر اعظم طبیعت خراب ہونے کے باعث عمرہ ادائیگی کے لیے سعودی عرب نہ جا سکے، نواز شریف کا ذاتی معالج ڈاکٹر عدنان روزانہ کی بنیاد پر چیک اپ کر رہے ہیں۔
نواز شریف نے وزیر اعظم شہباز شریف اور وزیر اعلیٰ مریم نواز کے ہمراہ سعودی عرب جانا تھا، مریم اورنگزیب نے بھی پریس کانفرنس میں گزشتہ روز ان کی طبیعت ناسازی کا ذکر کیا تھا۔
‘قومی سلامتی کا اجلاس بلانے والے بتائیں نواز نے بائیکاٹ کیوں کیا؟ ‘
واضح رہے کہ سابق وزیر اعظم نے پارلیمان کی قومی سلامتی کمیٹی کے اجلاس میں بھی شرکت نہیں کی تھی، جس پر اپوزیشن کی جانب سے مختلف قیاس آرائیاں کی گئی ہیں۔
بیرسٹر ڈاکٹر سیف کا کہنا تھا کہ قومی سلامتی پارلیمانی کمیٹی کا اجلاس بلانے والے بتائیں، نواز شریف کیوں نہیں آئے؟ کیا قومی سلامتی پارلیمانی کمیٹی کے اجلاس میں ان کی غیر موجودگی دہشت گردوں کی حمایت ہے؟ انھوں نے کہا کہ اجلاس بلانے والے بتائیں انھوں نے اجلاس کا بائیکاٹ کیوں کیا، کیا ان کے پلیٹ لیٹس پھر گر گئے ہیں کہ اجلاس میں نہیں آئے۔
وزیر اعظم کے مشیر برائے سیاسی امور رانا ثنااللہ نے کہا تھا کہ اجلاس میں مسلم لیگ ن کی حکومت کی نمائندگی موجود تھی، نواز شریف کی پارٹی کی بھرپور نمائندگی بھی موجود تھی، اس لیے نواز شریف اجلاس میں آتے تب بھی ٹھیک تھا نہ آتے تب بھی ٹھیک تھا۔
