فیصل آباد: سابق وزیر اعظم و قائد مسلم لیگ (ن) نواز شریف کا کہنا ہے کہ ہم وہ زمانہ واپس لائیں گے جب روٹی 4 اور پیٹرول 65 روپے لیٹر ملتا تھا۔
جلسے سے خطاب میں نواز شریف نے کہا کہ فیصل آباد کے لوگوں کا شکریہ ادا کرنے کیلیے الفاظ نہیں، یہاں کے ہر بندے کے پاس روزگار ہونا چاہیے، ایک کروڑ نوکری لانے والوں نے کیا کسی کو نوکری دی؟ شہباز شریف صاحب مجھے یہاں 5 سال کے بعد کوئی بے روزگار نظر نہیں آنا چاہیے۔
نواز شریف نے کہا کہ فیصل آباد وہ شہر ہے جس کے دائیں اور بائیں دونوں جانب موٹروے ہے، اب اس کے آگے اور پیچھے سے بھی موٹروے گزرے گی، ہم جو بات کرتے ہیں اس کو پورا کرنا جانتے ہیں۔
انہوں نے کہا کہ طلال چوہدری وفاداری کی مثال ہے اور رانا ثنا اللہ میرا بہترین اور وفادار ساتھی ہے، جب آپ پیدا بھی نہیں ہوئے تھے یہ تب سے میرے دوست ہیں۔
بانی پی ٹی آئی پر تنقید کرتے ہوئے نواز شریف نے کہا کہ وہ دھرنے کر رہے تھے اور ہم لوڈشیڈنگ اور دہشتگردی کا خاتمہ کر رہے تھے، ہمارے دور میں گیس سستی تھی اور سونا 50 ہزار فی تولہ تھا، غریب ماں باپ کو بیٹی کی شادی کرنے کی فکر نہیں تھی۔
قائد (ن) لیگ کا کہنا تھا کہ ہماری حکومت ختم نہ کی جاتی نواز شریف کو سزا نہ دی جاتی تو کوئی شخص بے رروزگار نہ ہوتا، رانا ثنا اللہ اور چوہدری شیر علی کو مبارک ہو کیونکہ 8 فروری کو آپ جیتیں گے۔
ان کا کہنا تھا کہ ہم 1 کروڑ نوکری، بلین ٹری اور 50 لاکھ گھر والے لوگ نہیں۔
