لاہور: وزیراعظم نواز شریف نے کہا ہے کہ گریٹر اقبال پارک دھرنے کی جگہ نہیں، یہاں یہ بات لکھ کر لگادی جائے،دہشت گردی ختم ہورہی ہے، ملک میں اب 3 برس قبل والے حالات نہیں،سڑکوں اور موٹر ویز سے پورا ملک آپس میں مل رہا ہے، یہ ہے تبدیلی اور یہ ہے انقلاب جو دیکھنے والوں کو نظر آرہا ہے۔
یہ بات انہوں نے لاہور میں گریٹر اقبال پارک کے افتتاح پر منعقدہ تقریب سے خطاب کرتے ہوئے کہی۔
انہوں نے کہا کہ آج ہم جہاں کھڑے ہیں یہ صرف زمین کا ایک ٹکڑا نہیں ہے، یہ وہی جگہ ہے جہاں ماضی مستقبل کے گلے مل رہا ہے، زمین کا یہ ٹکڑا کئی تاریخی واقعات اپنے اندر سمیٹے ہوئے ہے، گریٹر اقبال پارک لاہور کی خوب صورتی میں ایک نئے باب کا اضافہ ہے، شہاز شریف اور ان کی ٹیم کو مبارک باد پیش کرتا ہوں۔
انہوں نے کہا کہ دھرنے والے ایسی جگہوں کی تلاش میں ہیں، گریٹر اقبال پارک کسی دھرنے کی جگہ نہیں ہے یہ بات یہاں لکھ کر لگادینی چاہیے۔
وزیراعظم کا کہنا تھا کہ دہشت گردی ختم ہورہی ہے،ملک میں آج سے تین سال قبل والے حالات نہیں ہیں، بہتری آئی ہے، بجلی آئے گی تو ہمارے شہر اور پاکستان روشن ہوگا، جہاں روشنیاں ختم ہوگئی تھیں وہاں اب روشنیاں بحال ہورہی ہیں، بجلی آئے گی تو انڈسٹریاں چلیں گی، روزگار ملے گا اور زراعت نمو پائے گی، بے روزگاری ختم ہوگی، پاکستان کی آمدنی میں اضافہ ہوگا۔
انہوں نے کہا کہ بلوچستان پہلے سے بھی زیادہ ترقی کرے گا، کوئی جا کر وہاں دیکھے صوبے میں سڑکوں کا جال بچھا دیا، شرپسند عناصر کا خاتمہ کردیا، امن کے دشمن لوگ اب سمجھ نہیں پارہے کہ عوام کو کیا جوازپیش کریں، بلوچستان اب بہت تیزی کے ساتھ ترقی کا سفر طے کررہا ہے اور واقعتاً پاکستان کا اہم جز بن رہا ہے۔
نواز شریف نے کہا کہ چند روز قبل گوادر سے کوئٹہ جانے والی سڑک کا افتتاح کیا،پہلے کوئٹہ سے گوادر جانے میں دو دن لگتے تھے اب محض 8 گھنٹے لگتے ہیں، لاہور قلعے کی بھی تزئین و آرائش ہونے والی ہے،یہ کتنی بڑی تبدیلی ہے، یہ ہے انقلاب ،لوگ سمجھ رہے ہیں، دیکھنے والوں کو نظر آرہا ہے کہ ہماری حکومت کیا کررہی ہے۔
انہوں نے کہا کہ سڑکوں اور موٹر ویز سے پورا ملک آپس میں مل رہا ہے، لاہور سے ملتان کی موٹر وے 2018ء میں مکمل ہوجائے گی، ملتان سے سکھر کی موٹر وے 2019ء میں مکمل ہوجائے گی، ہم بجٹ کا بہت بڑا حصہ سڑکوں کی تعمیر پر خرچ کررہے ہیں۔
نواز شریف نے سابقہ حکومت پر تنقید کی اور کہا کہ مجرمانہ غفلت کے سبب ماضی میں بجلی نہیں بنائی گئی، چھوٹے قصبوں میں اسپتال تعمیر کیے جائیں گے۔
سیاح پارک میں پاکستانی کھانوں سے محظوظ ہوں گے، وزیر اعلیٰ پنجاب
قبل ازیں وزیراعلیٰ پنجاب شہباز شریف نے اپنے خطاب میں کہا کہ گریٹر اقبال پارک میں پاکستان کی تاریخ و ثقافت کو اجاگر کیا گیا ہے، پارک نہ صرف پاکستان بلکہ بیرون ملک بھی وطن کی ترجمانی کرے گا، سیاح پارک میں پاکستانی کھانوں سے محظوظ ہوں گے۔
نثار پر تنقید کرنے والے رحمان ملک کا دور بھول گئے، دانیال عزیز
لیگی رہنما دانیال عزیز نے کہا کہ چوہدری نثار پر تنقید کرنے والے سابق وزیر داخلہ رحمان ملک کا دور بھول گئے، اس دور میں روز ایک دھماکا ہوتا تھا لوگ ذبح کیے جاتے تھے، رحمان ملک کے دور میں پاسپورٹ کا حصول آسان نہ تھا، شناختی کارڈ چھ چھ ماہ بعد بنتا تھا۔
وزیراعظم کی آمد، سڑکیں بند، ٹریفک جام، شہری پریشان
دریں اثنا وزیراعظم نواز شریف کی جانب سے گریٹر اقبال پارک کے افتتاح کے سلسلے میں سیکیورٹی اہلکار صبح سے ہی تعینات کر دیئے گئے تھے اور پارک کے گرد ونواح کو صبح سے ہی سیل کر دیا گیا تھا،سڑکیں بند ہونے سے گاڑیوں کی طویل قطاریں لگ گئیں اور شہریوں کو شدید مشکلات کا سامنا رہا۔
وزیراعظم اور وزیر اعلیٰ 50 گاڑیوں کے قافلے میں اقبال گریٹر پارک سے روانہ ہوئے، دونوں بھائیوں نے واپسی کے لیے دو علیحدہ روٹ اختیار کیے جس سے عوام کو دہری مشکلات کا سامنا کرنا پڑا۔
