لاہور ہائیکورٹ میں نواز شریف، اسحاق ڈار، انوار الحق کاکڑ، محسن نقوی اور سرفراز بگٹی کی نا اہلی کی درخواست کی سماعت ہوئی۔
اے آر وائی نیوز کے مطابق لاہور ہائیکورٹ میں سابق وزیراعظم نواز شریف، سابق نگراں وزیراعظم انوار الحق کاکڑ، نائب وزیراعظم اور وزیر خزانہ اسحاق ڈار، وزیر داخلہ محسن نقوی اور وزیراعلیٰ بلوچستان سرفراز بگٹی کی نا اہلی کی دائر درخواست پر سماعت ہوئی اور عدالت عالیہ نے درخواست گزار کو رجسٹرار آفس کا اعتراض دور کرنے کی ہدایت کی۔
رجسٹرار آفس کا اعتراض ہے کہ سرفراز بگٹی کے خلاف درخواست لاہور ہائیکورٹ میں دائر نہیں کی جا سکتی۔
درخواست گزار کی جانب سے درخواست میں الیکشن کمیشن سمیت دیگر کو فریق بنایا گیا ہے اور استدعا کی گئی ہے کہ عدالت نواز شریف سمیت دیگر تمام کو نا اہل قرار دے۔
درخواست گزار نے موقف اختیار کیا کہ نواز شریف اور اسحاق ڈار آئین کے آرٹیکل 63 پی کے تحت نا اہل ہوئے اور عدالت نے ان دونوں کو اشتہاری قرار دیا۔ عدالت سے اشتہاری قرار دیا گیا کوئی بھی شخص پبلک آفس ہولڈ نہیں کر سکتا۔
اسی درخواست میں یہ بھی کہا گیا کہ انوار الحق کاکڑ، محسن نقوی اور سرفراز بگٹی نے بطور نگراں آئین کی خلاف ورزی کی اور آئین میں دیے گئے 90 دن کی زائد وقت تک نگراں عہدوں پر تعینات رہے۔
