جڑانوالہ : سابق نااہل وزیر اعظم میاں محمد نواز شریف نے جلسے میں ڈاکٹر طاہرالقادری کی نقل اتاری، انہوں نے کارکنان سے اپنے پیار کا بھی اظہار کیا جبکہ خطاب کےدوران سیکیورٹی پر مامور اہلکاروں نے کارکنان کو کنٹینر سے نیچے پھینک دیا، اسٹیج پر اتنے زیادہ لوگ چڑھ گئے کہ اسٹیج کا ایک حصہ گرپڑا۔
تفصیلات کے مطابق جڑانوالہ میں عوامی جلسے سے خطاب کے دوران نواز شریف خوشگوار موڈ میں دکھائی دیئے اس موقع پر انہوں نے مخالفین کو خوب تنقید کا نشانہ بنایا۔
نواز شریف نے ڈاکٹر طاہرالقادری پر تنقید کرتے ہوئے کہا کہ طاہرالقادری پاکستان سیاست کرنےآرہے ہیں جوایک تار سے ڈر جاتے ہیں وہ ہماری حکومت کیا گرائیں گے؟
بجلی کی تار سے ڈرنے والے ہم سے ٹکرلینے آرہے ہیں، جوخود کو نہیں سنبھال سکتے وہ عوام کو کیاسنبھالیں گے، انہوں نے تنبیہ کی کہ 2018 میں ان کو ایسا دھکا دوں گا کہ دوبارہ نظر نہیں آئیں گے۔
ایک موقع پر انہوں نے کارکنوں سے پیار کا اظہار بھی کیا، کارکنان کی جانب سے ’’ آئی لو یو نوا زشریف‘‘ کے نعرے سن کر انہوں نے جواب دیا کہ نواز شریف بھی آپ سے بہت پیار کرتا ہے، آپ میرے اور میں آپ کا ہوں۔
جڑانوالہ میں نون لیگ کے سیاسی پاور شو کے دوران بدنظمی عروج پر تھی، کارکنوں کو لاٹھیاں ماری گئیں اور اسٹیج سے دھکے بھی دیئے گئے۔
کنٹینرمیں چڑھنے کی کوشش کرنے والے کارکنان کو پولیس نے دھکے دے کر نیچے پھینک دیا جس سے تین کارکن زخمی ہوگئے، اس کے علاوہ قانون پرتنقید کرنے والوں نے جلسے میں غیر قانونی طور پر بجلی بھی استعمال کی۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔
