مسلم لیگ ن کے قائد نواز شریف کا کہنا ہے کہ پاکستان واپس ترقی کے راستے پر چل پڑا ہے۔
لندن میں میڈیا سے گفتگو کرتے ہوئے ن لیگ کے قائد میاں نواز شریف نے کہا کہ وزیراعظم شہباز شریف اور مریم نواز بہترین کام کررہے ہیں، اللہ تعالیٰ جب حالات بہتر کرتا ہے تو اس کی رحمتیں برستی ہیں۔
ن لیگ کے قائد نے کہا کہ شہباز شریف نے ترقی کی بنیاد رکھی، مریم نواز آگے لے کر چل رہی ہیں، ہم نے پاکستان میں کینسر اور دل کے امراض کے اسپتال قائم کیے ہیں۔
انہوں نے کہا کہ صحت اور تعلیم کے شعبوں پر خاص توجہ دے رہے ہیں۔
نواز شریف کا کہنا ہے کہ عوام کی مشکلات میں کمی آرہی ہے، پاکستان واپس ترقی کے راستے پر چل پڑا ہے۔
چند روز قبل سابق وزیرِ اعظم اور ن لیگ کے صدر نواز شریف نے ایران پر حملے کو اسرائیل کی بڑی غلطی قرار دیا تھا۔
ایک بیان میں نواز شریف کا کہنا تھا کہ اسرائیل کا ایران پر حملہ انتہائی افسوس ناک ہے، اس سے بڑھ کر اسرائیل کی غلطی ہو نہیں سکتی، اس طرح سے حملے کرنا بہت زیادتی ہے۔
