لاہور: مسلم لیگ ن کے رہنماؤں اور کارکنوں کی بڑی تعداد بیگم کلثوم نواز کے انتقال پر اظہارِ تعزیت کے لیے جاتی امرا پہنچ گئی ہے، نواز شریف اور ان کی صاحب زادی مریم تعزیت کرنے والوں سے ملنے کے لیے باہر آ گئے۔
تفصیلات کے مطابق مرحومہ کلثوم نواز کی تعزیت کے لیے بڑی تعداد میں لیگی رہنما اور کارکن جاتی امرا پہنچ چکے ہیں، ان سے ملنے کے لیے سابق وزیرِ اعظم اور مریم نواز کو باہر آنا پڑا۔
نواز شریف اڈیالہ جیل سے پیرول پر رہائی کے بعد پہلی بار تعزیت کرنے والوں سے ملے، لیگی رہنماؤں اور کارکنوں نے ان سے مل کر اظہارِ تعزیت کیا۔
دوسری طرف مریم نواز بھی پیرول پر رہائی کے بعد تعزیت کے لیے آنے والی خواتین سے باہر آ کر ملیں، لیگی کارکن خواتین نے ان سے والدہ کی وفات پر تعزیت کی۔
تعزیت کے لیے جاتی امرا پہنچنے والوں میں متحدہ مجلس عمل کا وفد بھی شامل ہے، ایم ایم اے کے وفد میں فضل الرحمان، لیاقت بلوچ، پیر اعجاز ہاشمی اور فرید پراچہ و دیگرشامل ہیں۔
لندن: بیگم کلثوم نواز کی نماز جنازہ ادا کر دی گئی
مسعود خان، خورشید قصوری، سائرہ افضل تارڑ اور حریت رہنما یاسین ملک بھی جاتی امرا پہنچ گئے ہیں، انھوں نے نواز شریف سے مل کر اہلیہ کے انتقال پر تعزیت کی۔
