بہاولپور: پاکستان مسلم لیگ ن کی چیف آرگنائزر مریم نواز نے کہا ہے کہ آنے والے چند ہفتوں میں نواز شریف پاکستان آ جائیں گے۔
تفصیلات کے مطابق صوبہ پنجاب کے شہر بہاولپور میں مسلم لیگ ن کے رہنماؤں نے میڈیا سے گفتگو کی، مریم نواز نے کہا کہ ہم نے عوامی رابطہ مہم شروع کی ہے، نواز شریف بھی بہت جلد آ جائیں گے۔
مریم نواز نے کہا کہ سابق وزیر اعظم میاں نواز شریف پاکستان واپس آنے کی تیاری کر رہے ہیں۔
مسلم لیگ ن کی سینئر نائب صدر نے پشاور سانحے پر کہا کہ صوبہ خیبر پختون خوا میں 10 سالوں میں کاؤنٹر ٹیررزم کا ڈیپارٹمنٹ کرائے کی بلڈنگ میں ہے، یہ اس عرصے میں اپنی لا اینڈ انفورسمنٹ ایجنسی کے لیے کچھ نہیں کر سکے، کے پی کو فرانزک لیب بھی پنجاب کی استعمال کرنا پڑتی ہے۔
مریم نواز نے واقعے کو بڑا سیکیورٹی لیپس قرار دیا اور کہا کہ واقعہ بہت بڑی کمزوری کے طور پر سامنے آیا ہے، انھوں نے عمران خان پر تنقید کرتے ہوئے کہا کہ آپ نے دہشت گردوں کے لیے دروازے اور سرحدیں کھولیں، اور انھیں دوست قرار دیا۔
مریم نواز نے مہنگائی کے حوالے سے کہا ’’آئی ایم ایف کا معاہدہ عمران خان نے کیا تھا، ہمارے ہاتھ بندھے ہوئے ہیں، اگر ہم عوام کو ریلیف دینا بھی چاہیں تو نہیں دے سکتے، آئی ایم ایف کہتا ہے کہ پہلے قیمتیں بڑھائیں پھر معاہدہ کریں گے۔‘‘
انھوں نے مزید کہا ’’جو معاہدہ عمران نے کیا اس کی پاسداری کریں گے تو عوام پر مشکلات آئیں گی، اور اگر اس معاہدے کی پاس داری نہیں کریں گے تو ملک پر مشکلات آئیں گی، ہم معاہدے کی وجہ سے عوام کو ریلیف نہیں دے پا رہے ہیں۔
