اسلام آباد : نااہلی بھی ہوئے فرد جرم بھی عائد ہوا مگرنوازشریف کے شاہانہ پروٹوکول میں کوئی کمی نہ آئی، احتساب عدالت میں نوازشریف کی پیشی پر وزراء اورکارکنان نے نااہل نواز شریف کا شاندار استقبال کیا۔
تفصیلات کے مطابق نااہل نوازشریف بے نظیر انٹرنیشنل ائیرپورٹ پہنچے تو انکا بادشاہوں کی طرح پھولوں کی پتیوں اور نعروں کیساتھ استقبال کیا گیا جبکہ نوازشریف نے بھی کارکنان کو ہاتھ ہلا کرجواب دیا۔
اس موقع پر سلام آباد ائیرپورٹ پر سیکورٹی انتظامات سخت کردیے گئے، جس سے عوام کو بہت مشکلات کا سامنا کرنا پڑا۔
نوازشریف کا قافلہ سخت سیکیورٹی حصارمیں احتساب عدالت پہنچایا گیا، جیسے ہی نوازشریف کی گاڑی احاطہ عدالت میں داخل ہوئی کارکنان نے گاڑی کو گھیرے لیا اور نعرے بازی کی۔
ملکی امور چھوڑ کر آج بھی وزراء حاضری لگانا نہ بھولے، وہیں کارکنان نے انکےحق میں نعرے لگائے۔
نوازشریف بھی عدالت میں داخل ہونے سے پہلے تمام رہنماؤں سے ملے، احتساب عدالت کے باہر حسب معمول سیکیورٹی اہلکاروں کی بڑی تعداد تعینات تھی جبکہ غیرمتعلقہ افراد کے داخلے پر پابندی عائد کی گئی۔
