گجرات: مسلم لیگ ن کے سابق نااہل صدر میاں محمد نوازشریف نے کہا ہے کہ میرے خلاف آنے والے فیصلوں میں غصے اور انتقام کی جھلک سب کو دکھائی دے رہی ہے، الیکشن سے باہر کرنے کے لیے نیا مقدمہ درج کیا جارہا ہے۔
ان خیالات کا اظہار انہوں نے مسلم لیگ ن کی جانب سے منعقدہ پارٹی جلسے سے خطاب کرتے ہوئے کیا، نواز شریف کا کہنا تھا کہ اتنی بڑی تعداد میں عوام کی شرکت اس بات کی غمازی ہے کہ قوم بیدار ہوچکی اور اُس نے اب لڑنے کا فیصلہ کرلیا، میں نے جو ووٹ کے تقدس کا پیغام دیا وہ سارے پاکستانیوں کے دلوں میں اتر چکا ہے۔
سابق نااہل وزیراعظم کا کہنا تھا کہ مجھ پر کرپشن یا خزانہ لوٹنے کا کوئی الزام نہیں، بیٹے سے تنخواہ نہیں لی تو 5 بندوں نے کروڑوں ووٹوں کی حرمت کو روندتے ہوئے میرے خلاف فیصلہ دیا، ملک کو 70 سالوں بیماری لاحق ہے اور اس اب سکہ شاہی کو ختم کرنے کا وقت آگیا ہے۔
مزید پڑھیں: میں عمران خان نہیں کہ کسی بھی معاملے پربولنا شروع کردوں‘ نوازشریف
انہوں نے سوال کیا کہ آپ کے ووٹوں کی حرمت کو پامال کیاگیا، منتخب وزیر اعظم کے ساتھ ایسا تضحیک آمیز سلوک کیا گیا، کیا آپ کو یہ سب منظور ہے؟ نوازشریف کا کہنا تھا کہ اگر میں نے کمیشن لیا ہوتا، کرپشن یا خزانہ لوٹنے کا جرم کیا ہوتا تو عدالت میں پیش ہونے کو تیار تھا مگر ابھی غصے اور انتقام سے ان کا پیٹ نہیں بھرا کیونکہ میرے خلاف ایک اور مقدمہ دائر ہونے والا ہے تاکہ مسلم لیگ ن انتخابات سے باہر کیا جائے اور عوام کی خدمت کا سلسلہ بند ہو۔
نوازشریف کا کہنا تھا کہ ’میں نے تو کہہ دیا تھا میرا نام بھی مجھ سے چھین لیں، ہمارے امیدواروں کو سینیٹ الیکشن میں حصہ نہیں لینے دیا گیا اور یہ کہا کہ ٹکٹ پر نوازشریف کے دستخط موجود ہیں، سب نے آزاد حیثیت سے انتخابات میں ہماری حمایت سے حصہ لیا اور صوبائی اسمبلیوں نے عدالتی فیصلے کو مسترد کیا کیونکہ ہم انتخابات واضح اکثریت سے جیت گئے‘۔
اسے بھی پڑھیں: میرا نام محمد نوازشریف ہےاسےبھی چھیننا ہےتوچھین لو‘ نوازشریف
اُن کا کہنا تھا کہ پاکستان کے ایٹمی پروگرام، بجلی گھروں کی تعمیرات اور دیگر منصوبوں پر بھی میرے دستخط موجود ہیں انہیں بھی ختم کردو اور یہ بھی دیکھا جائے کہ جن ججوں کی تعیناتی میرے دستخط سے ہوئی اُن کے خلاف بھی فیصلہ کرو۔
نوازشریف کا کہنا تھا کہ آپ کو 2018 میں صرف مسلم لیگ ن کو ووٹ نہیں دینا بلکہ انقلاب بھی لانا ہوگا، اللہ کے فضل سے اگلی حکومت بھی مسلم لیگ ن کی آئے گی اور غریبوں کو رہنے کے لیے مکان دیا جائے گا، ہم انصاف کو عوام کے دروازے تک پہنچائیں گے کیونکہ سب جانتے ہیں کہ نوازشریف اپنا وعدہ پورا کرتا ہے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
