لاہور : مسلم لیگ ن کے صدر نواز شریف نے پارٹی قیادت کا ہنگامی اجلاس آج طلب کرلیا، جس میں ملک کی سیاسی اور معاشی صورت حال پر گفتگو ہوگی۔
تفصیلات کے مطابق مسلم لیگ (ن) نے آج ہنگامی اجلاس طلب کرلیا، پارٹی کے صدر اور سابق وزیراعظم نواز شریف کی زیر صدارت اجلاس مرکزی سیکریٹریٹ ماڈل ٹاؤن لاہورمیں ہوگا۔
ذرائع نے بتایا ہے کہ وزیراعظم شہبازشریف، وزیراعلیٰ مریم نوازاورسابق وزیراعلیٰ حمزہ شہباز بھی اجلاس میں شریک ہوں گے جبکہ نائب وزیراعظم اسحاق ڈار، رانا ثنااللہ سمیت وفاقی وصوبائی وزرا اورسینئرلیگی رہنماؤں کوبھی شرکت کی ہدایت کی گئی ہے.
اجلاس میں ملک کی سیاسی اور معاشی صورت حال پر گفتگو ہوگی۔
خیال رہے ن لیگ کے صدر اور سابق وزیر اعظم میاں محمد نواز شریف کا لندن جانے کا امکان ہے، ذرائع کا کہنا تھا کہ نواز شریف ستمبر کے اختتام یا اکتوبر کے پہلے ہفتے لندن روانہ ہوسکتے ہیں، جہاں وہ اپنے معالجین سے روٹین چیک اپ کرائیں گے۔
ذرائع کے مطابق ن لیگ کے قائد لندن میں قیام کے دوران طبی معائنہ،صاحبزادوں کے ساتھ وقت گزاریں گے۔
واضح رہے کہ میاں سابق وزیر اعظم 21 اکتوبر 2023 کو 4 سال بعد پاکستان واپس آئے تھے۔
