The news is by your side.

Advertisement

الیکشن 2018، نوازشریف ہی وزیراعظم ہوں گے، عابد شیر علی

اسلام آباد: وزیرمملکت عابد شیر علی نے کہا ہے کہ نوازشریف کو دہشت گردی ختم کرنے کی سزا دی جارہی ہے، وہ لوگ مسلم لیگ ن کے خلاف سازشیں کررہے ہیں جنہیں اگلی حکومت بھی ہماری دکھائی دے رہی ہے، 2018 کے انتخابات میں نوازشریف کو وزیراعظم بننے سے کوئی بھی طاقت نہیں روک سکتی۔

اسلام آباد میں میڈیا سے گفتگو کرتے ہوئے عابد شیر علی نے کہا کہ مسلم لیگ ن چاہتی تو بلوچستان میں حکومت بنا سکتی تھی مگر ہم نے وہاں کے معاملات عبدالمالک کے حوالے کیے اسی طرح ہم نے نہ چاہتے ہوئے بھی خیبرپختونخواہ میں عمران خان کو حکومت بنانے دی۔

انہوں نے سوال کیا کہ جن لوگوں نے اقتدار میں رہ کر ملک کو لوٹا اُن کا احتساب کون کرے گا؟، نوازشریف کے کارباری معاملات میں پورے خاندان کو یکجا کرنے کی کوشش کیوں کی جارہی ہے؟۔

عابد شیر علی کا کہنا تھا کہ نوازشریف اور مسلم لیگ ن نے عدلیہ کی آزادی کے لیے قربانیاں دی ہیں جبکہ شیخ رشید جیسے لوگ آج بھی عدالت کے خلاف ہرزہ سرائی میں مصروف ہیں، اب جب عدلیہ آزاد ہے تو ججز کو شیخ رشید کے بیانات کا ازخود نوٹس لے کر پوچھنا چاہیے وہ کس کی ایما پر متنازعہ بیانات دے رہے ہیں۔

وزیرمملکت برائے پانی و بجلی نے کہا کہ زبان تو ہماری بھی بہت تیز ہے اگر ہم نے لب کشائی شروع کی تو بات بہت دور تک جائے گی، شریف خاندان نے کرپشن کی ہوتی تو مشرف کی ٹیم عدالت کو ثبوت فراہم کردیتی،

اُن کا مزید کہنا تھا کہ اگر کسی کے پاس نواز شریف یا اُن کے خاندان کے کرپشن کے ثبوت ہیں تو وہ عدالت میں پیش کرے ورنہ الزامات نہ لگائے کچھ سیاسی لوگ ہرسال ہماری حکومت کے خلاف بحران کی کیفیت پیدا کرنے کی کوشش کرتے ہیں مگر ہم کبھی نہیں میدان سے بھاگے نہیں اور نہ ہی کسی سے مدد طلب کی، آج وہی لوگ شریف خاندان کے خلاف سازشیں کررہےہیں جونوازشریف کوآئندہ حکومت میں دیکھ رہےہیں، 2018 کے انتخابات میں نوازشریف کو وزیراعظم بننے سے کوئی بھی طاقت نہیں روک سکتی۔

Print Friendly, PDF & Email

Comments

comments

یہ بھی پڑھیں