لاہور: شدید طبی مسائل کے شکار سابق وزیر اعظم نواز شریف کی عبوری ضمانت کی مدت آج ختم ہو رہی ہے۔
تفصیلات کے مطابق آج منگل کے دن نواز شریف کی طبی بنیادوں پر ضمانت کی مدت ختم ہوجائے گی، سابق وزیر اعظم کے خلاف العزیزیہ ریفرنس کی سماعت بھی آج ہوگی۔
اسلام آباد ہائی کورٹ نے انسانی بنیادوں پر نواز شریف کی منگل تک سزا معطلی اور ضمانت منظور کی تھی، عدالت نے 20 لاکھ روپے کے 2 مچلکے بھی جمع کرانے کا حکم دیا تھا۔
عدالت نے اپنے تحریری حکم نامے میں کہا تھا کہ نواز شریف کی درخواست 29 اکتوبر کے لیے مقرر ہے، وزیر اعلیٰ پنجاب عثمان بزدار بھی 29 اکتوبر کو ذاتی طور پر ڈیڑھ بجے ہائی کورٹ کے ڈویژن بینچ میں پیش ہوں۔
تازہ ترین: نواز شریف نے بلاول بھٹو سے ملنے سے انکار کر دیا، پی پی قیادت حیران
نواز شریف کی ضمانت کی درخواستوں پر اسلام آباد ہائی کورٹ نے دو صفحات پر مشتمل تحریری حکم نامہ جاری کیا، حکم نامے پر چیف جسٹس اور جسٹس محسن اخترکیانی کے دستخط تھے۔
ادھر احتساب عدالت میں شہباز شریف کے بیٹے سلمان شہباز اشتہاری قرار دے دیے گئے ہیں، نیب کا کہنا ہے سلمان شہباز کو کئی بار منی لانڈرنگ اور آمدن سے زائد اثاثہ جات کیس میں طلب کیا گیا لیکن وہ پیش نہیں ہوا۔ لیگی صدر کے بیٹے کی منقولہ اور غیر منقولہ جائیداد کو بھی ضبط کیا گیا۔
خیال رہے کہ نواز شریف کی صحت تاحال سنبھل نہیں سکی ہے، ان کا علاج میڈیکل بورڈ کے لیے چیلنج بن گیا ہے، وہ پریشان ہیں ان کا شوگر سنبھالیں، بلڈ پریشر یا پلیٹ لیٹس۔ اسٹیرائیڈز دینے سے سابق وزیر اعظم کا بلڈ پریشر اور شوگر لیول بڑھ گیا ہے، دوسری طرف پلیٹ لیٹس مزید کم ہو گئے ہیں۔
