اسلام آباد : این سی او سی نے بڑھتے ہوئے کورونا کیسز کے پیش نظر رش والے مقامات پر ماسک کا استعمال لازمی قرار دے دیا۔
تفصیلات کے مطابق ملک میں کورونا وائرس پھر سر اٹھانے لگا ، اس حوالے سے این سی اوسی کا اہم اجلاس ہوا۔
این سی او سی نے رش والے مقامات پر ماسک کا استعمال لازمی قرار دے دیا اور کورونا صورتحال کے پیش نظر گائیڈ لائنز جاری کر دیں۔
این سی اوسی نے کہا کہ ملک میں کورونا گائیڈ لائنز 30 اپریل تک نافذ العمل رہیں گی، طبی مراکز، اسپتال عملے اور مریضوں کیلئے ماسک کا استعمال لازم ہو گا۔
یاد رہے محکمہ صحت نے نجی اسپتال میں کورونا کیسز کی تصدیق کرتے ہوئے بتایا کہ نجی اسپتال و یونیورسٹی کا عملہ اور طالب علم بڑی تعداد میں کورونا میں مبتلا ہے۔
انتظامیہ کی جانب سے اسپتال و یونیورسٹی میں تمام عملہ اور طالبعلموں کو آگاہ کردیا گیا ہے۔
محکمہ صحت حکومت سندھ کے مطابق خوش قسمتی سے تمام افراد میں کورونا کی معمولی علامات سامنے آئی ہیں ،کچھ افراد میں موسمی فلو کی علامات بھی سامنے آئی ہیں۔
اسپتال و جامعہ میں اس سلسلے میں الرٹ جاری کردیا گیا ہے، اس سے یہ ظاہر ہوتا ہے کہ ہمارے ماحول میں اب بھی کورونا وائرس موجود ہے ،لوگوں کو مسلسل متاثر کررہا ہے۔
