کراچی : نیشنل ڈیزاسٹر منیجمنٹ اتھارٹی نے سندھ میں مون سون سسٹم سے اربن فلڈنگ کاخدشہ ظاہر کردیا ، جس سے کراچی بھی متاثر ہوسکتا ہے۔
تفصیلات کے مطابق نیشنل ڈیزاسٹر منیجمنٹ اتھارٹی کی جانب سے کہا گیا کہ کہ سندھ کے مختلف علاقوں میں اربن فلڈنگ اور ندی نالوں میں درمیانے درجے کی طغیانی متوقع ہے۔
این ڈی ایم اے نے الرٹ میں کہا ہے کہ نیشنل ایمرجنسی آپریشن سینٹر کے مطابق موجودہ مون سون سسٹم کے زیر اثر اگلے 12 سے 24 گھنٹوں میں سندھ اثر انداز ہونے کا امکان ہے ، جس سے سندھ کے مختلف علاقوں میں اربن فلڈنگ کاخدشہ ہے۔
ترجمان نے بتایا کہ سندھ کے علاقے کشمور، کراچی، حیدرآباد، ٹھٹھہ، عمرکوٹ، بدین، مٹھی، تھرپارکر متاثر ہو سکتے ہیں ، بارشوں کے باعث مقامی اربن فلڈنگ/ ندی نالوں میں درمیانے درجے کی طغیانی ہو سکتی ہے۔
الرٹ میں کہنا تھا کہ نشیبی علاقوں کے مکین ممکنہ سیلابی صورتحال سے نمٹنے کیلئے پیشگی تیاری مکمل رکھیں اور خطرے سے دو چار علاقوں کے رہائشی مقامی حکام کی ہدایات پر عمل کریں۔
این ڈی ایم اے نے کہا کہ عوام بروقت الرٹس کے لیے ‘پاک این ڈی ایم اے ڈیزاسٹر الرٹ’ موبائل ایپ ڈاؤن لوڈ کریں اور موسمی صورتحال سے آگاہ رہیں۔
