اسلام آباد : رواں ہفتے طوفانی بارشوں اور سیلابی صورتحال کے خطرے کے پیش نظر الرٹ جاری کردیا گیا۔
تفصیلات کے مطابق نیشنل ڈیزاسٹرمینجمنٹ اتھارٹی نے ملک میں رواں ہفتے طوفانی بارشوں اورسیلابی صورتحال کے خطرے کے پیش نظر الرٹ جاری کردیا۔
ترجمان نے بتایا کہ بحیرہ عرب اور خلیجِ بنگال سے موسمی سسٹمز پاکستان کے بالائی علاقوں میں داخل ہورہے ہیں، جو مغربی ہواؤں کے ساتھ مل کر شدید بارشوں کا باعث بنیں گے، جس سے گلگت بلتستان اور آزاد کشمیر کا زیادہ متاثر ہونے کا امکان ہے۔
این ڈی ایم اے نے خبردار کیا ہے کہ اس دوران ندی نالوں میں طغیانی، نشیبی علاقوں میں اربن فلڈنگ، اور لینڈسلائیڈنگ کاخطرہ موجود ہے جبکہ شدید آندھی سے درخت اُکھڑنے، بجلی کی بندش اورکمزور ڈھانچوں کو نقصان پہنچنے کا اندیشہ ہے۔
موسم سے متعلق خبریں
این ڈی ایم اے نے ممکنہ خطرات کےضلعی انتظامیہ اور ریسکیو اداروں کو حفاظتی اقدامات یقینی بنانے کی ہدایت کی ہے اور عوام کو بھی محتاط رہنے، غیر ضروری سفر سے گریز کا مشورہ دیا ہے۔
دوسری جانب خیبر پختونخوا کے مختلف اضلاع میں بارشوں سے جانی اور مالی نقصانات ہوئے ہیں، پی ڈی ایم اے کے مطابق بیس جون سے اب تک ہونے والی بارشوں کےباعث حادثات میں چھ افراد جاں بحق اور کئی زخمی ہوئے۔
حادثات میں گھروں کو بھی نقصان پہنچا تاہم مرنے والوں میں خواتین اور بچے بھی شامل ہیں۔
